Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 422 Hüküm no: 562 Orijinal metin no: [93a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Dimitri ve kardeşlerinin miras evlerini Apostol v. Ligori’ye satmaları Kazâ-i Havâss-ı Aliyye müzâfâtından kasaba-i Çatalca’da Büyük mahallede sâkin Yorgi v. Dimitri nâm zimmî meclis-i şer‘-i hatîrde işbu hâmilü’l-kitâb Apostol v. Ligori muvâcehesinde ikrâr ve takrîr-i kelâm edip bundan akdem mahalle-i mezbûrede sâkin iken hâlik olan babam Dimitri’nin [dü]yûn-ı müteferrikası olmağla li ebeveyn karındaşım Aleksi ve kız karındaşım Badiye mahalle-i merkūmede vâki‘ bir tarafdan Todori v. Mavridi mülküne ve bir tarafdan Mavridi v. Yorgi mülküne ve bir tarafdan İstefano ve Lavra mülküne ve bir tarafdan tarîk-i âma müntehî bir fevkānî ve bir tahtânî beyti müştemil mülk-i mevrûsumuzu cümle-i tevâbi‘i ile mezbûr Apostol’e yedi bin iki yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ edip meblağ-ı mersûm yedi bin iki yüz akçe ile babamız hâlik-i mezbûrun düyûn-ı müteferrikasın edâ ve îfâ eylemişlerdir hâlâ meblağ-ı mezbûr benim dahi makbûlümdür menzil-i mahdûd-ı mezkûr merkūm Apostol’ün mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-mezbûr Apostol vicâhen tasdîk edicek mâ hüve’l-vâki‘ bi’t-taleb ketb olundu. Hurrire fî evâhiri Zilka‘deti’ş-şerîfe sene tis‘a ve ışrîn ve elf. Şuhûdü’l-hâl: Mustafa b. Mehmed, Yakub b. Kurd, Ali b. Abdullah, Perviz b. Abdullah.