Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 422 Hüküm no: 561 Orijinal metin no: [93a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem Beşe b. Abdullah’ın evini hanımı Kerime bt. Süleyman’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Şeyh Ahmed mahallesi sâkinlerinden fahrü’l-eşbâh Rüstem Beşe b. Abdullah nâm râcil meclis-i şer‘-i mutahharda, hâmiletü’l-kitâb zevcesi Kerime bt. Süleyman muvâcehesinde ikrâr ve takrîr-i kelâm edip mahalle-i merkūmede vâki‘ bir tarafı Ali b. Abdullah mülküne ve bir tarafı Yakub Ağa vakfı’na ve bir tarafı Fâtıma bt. Abdullah mülküne ve bir tarafı tarîk-i âma müntehî ve mahdûd iki fevkānî beyti ve ahırı ve sofayı ve tahta-pûşu ve kenîfi ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ile zevcem mezbûreye on beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân hudûd ile mahdûd olan menzil merkūme Kerime’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıfe olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūme Kerime vicâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâmin ve’l-ışrîn min Zilka‘deti’ş-şerîfe sene tis‘a ve ışrîn ve elf. Şuhûdü’l-hâl: Abdurrahman Çelebi el-İmâm, İbrahim Efendi el-Hatîb, Ömer b. Süleyman, Ahmed b. Mehmed.