Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 423 Hüküm no: 564 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anabolu kazâsından Yani’nin oğlunun evini Dimo v. Todori’ye satması Vilâyet-i Rumeli’nde Mora sancağında nefs-i Anabolu kazâsı mahallâtından (…) v. Yani nâm zimmî meclis-i şer‘-i mutahharda, işbu bâ‘isü’l-kitâb Dimo v. Todori nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Dimitri v. Yorgi mülküne ve bir tarafdan Manaki v. Yorgo mülküne ve bir tarafdan Manol v. Dimyani mülküne ve bir tarafdan Hüsrev b. Abdullah mülküne müntehî ve mahdûd bir fevkānî ve bir tahtânî beyti ve bi’r-i mâyı ve havluyu müştemil mülk menzilimi cümle-i tevâbi‘ ve levâhıkı ile mezbûr Dimo’ya yirmi bin üç yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Dimo’nun mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Dimo vicâhen tasdîk ve tahkīk ettikde mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Zilhicce li sene tis‘a ve ışrîn ve elf. Şuhûdü’l-hâl: Fahrü’l-akrân Ahmed Bey, Hasan Efendi el-Mülâzım, Mahmud b. Hasan, Mustafa b. Hasan, Yusuf b. Abdullah, Mehmed Reis b. Abdullah, Mustafa b. Abdullah ve gayruhüm.