Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 424 Hüküm no: 565 Orijinal metin no: [93b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Kiro’nun Papa Todori v. Yani ile kızı Afendirye’nin alacağı konusunda sulh olması Kazâ-i Havâss-ı Aliyye müzâfâtından Küçükçekmece nâhiyesine tâbi‘ Kalatar[ya] nâm karye sâkinlerinden Aleksi v. Kiro nâm zimmî meclis-i şer‘-i mutahharda, kazâ-i mezbûra tâbi‘ Kurfa nâm karyede sâkin iken mürd olan Papa Todori v. Yani nâm zimmînin muhallefâtına usûbet-i nesebiyye ciheti ile vâzı‘u’l-yed olan Papa Aleksi v. Papa Dimitri muvâcehesinde ikrâr ve takrîr-i kelâm edip mürd-i merkūm hâl-i hayâtında sagīre kızım Afendirye’ye beş bin akçe nakid ve bin akçe kıymetli bir incili arakiyye ve iki bin akçe kıymetli bir gümüşlü kuşak ve bir kürklü siyah ferâce ve birkaç aded sahan ve tencere vasiyyet edip hâlik oldukda merkūm Papa Aleksi terekesine vâki‘ olduğu cihetden ben velâyetim hasebiyle da‘vâ ve taleb ettiğimde beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimize muslihûn tavassut edip an inkâr beş bin akçeye sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr beş bin akçeyi merkūm Papa Aleksi yedinden bi’t-tamâm ve’l-kemâl kızım mezbûre Afendirye için ahz ve kabz eyledim ba‘de’l-yevm husûs-ı mezbûra müte‘allik da‘vâ ve nizâ‘ım kalmadı dedikde mukırr-ı mezbûr Aleksi’nin minvâl-i muharrer üzre cârî olan ikrâr ve takrîrini mezbûr Papa Aleksi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî evâsıtı Zilka‘deti’ş-şerîfe li sene tis‘a ve ışrîn ve elf. Şuhûdü’l-hâl: Mustafa Çavuş b. Abdullah el-Mübâşir, Sinan Beşe b. Abdullah er-Râcil, Ahmed Beşe b. Abdullah er-Râcil, İbrahim b. Hasan, Yani v. Yani, Yorgi v. [Yor]gaki, Aleksi [v.] Kodine, Yorgi v. Ergiri.