Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 425 Hüküm no: 566 Orijinal metin no: [93b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Sinan’ın ev, bağ ve bostan hisseleri ile tarla tasarruf haklarını İbrahim b. Mehmed’e satması Vilâyet-i Rumeli’nde Arnavud Belgradı kazâsına tâbi‘ Balgori nâm karye sâkinlerinden fahrü’l-eşbâh Hasan Beşe b. Sinan nâm kimesne meclis-i şer‘-i mutahharda, işbu hâmilü’l-kitâb İbrahim b. Mehmed nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Hüseyin b. Hasan mülküne ve bir tarafdan dereye ve iki tarafdan tarîk-i âma müntehî bir fevkānî ve bir tahtânî beyti ve ahırı ve anbarı ve fırını ve bi’r-i mâyı müştemil mülk menzilde ve lede’l-ahâlî ma‘lûmü’l-hudûd tahmînen on iki çapalık bir kıt‘a bağda ve inde’l-ahâlî ma‘lûmü’l-hudûd bir kıt‘a bostan yerinde ve mevâzi‘-i müteferrikada vâki‘ beş dip dut eşcârı ve on dört dip armud eşcârı ve dört ceviz eşcârından sülüsünü, cümle-i tevâbi‘ ve levâhıkı ile bi safkatin vâhidetin merkūm İbrahim’e üç bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip zikr olunan mebî‘leri mahallinde kabza müşterî-i merkūmu taslît eylediğimden sonra yine karye-i mezbûre sınırı dâhilinde vâki‘ inde’l-ahâliyi’d-diyâr her biri ma‘lûmü’l-hudûd ve’l-mikdâr beş kıt‘a tarlada dahi sülüsünün hakk-ı tasarrufunu sâhib-i arz ma‘rifetiyle merkūm İbrahim’e tefvîz edip ol dahi tefevvüz ve kabûl ettikden sonra mukābele-i tefvîzinde olan bin nakd-i mezbûrü’n-na‘t akçeyi [merkūm İbrahim yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan mebî‘ler] merkūm İbrahim’in mülk-i müşterâ-yı sarîhidir ve mârrü’z-zikr beş kıt‘a tarlada dahi sülüsünün hakk-ı tasarrufu mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-merkūm İbrahim vicâhen tasdîk edicek mâ hüve’l-vâki‘ bi’t-taleb ketb olundu. Hurrire fî gurreti Zilhicce li sene tis‘a ve ışrîn ve elf. Şuhûdü’l-hâl: Kasım Beşe b. Abidin, Mehmed Bey b. Mehmed er-Râcil, Ali Bey b. Hasan el-Cündî Veli Beşe b. Hasan er-Râcil, Hasan Çavuş b. Mehmed, Ali b. Abdullah ve gayruhüm.