Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 426 Hüküm no: 568 Orijinal metin no: [94a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsteryano v. Nikola’nın bostan yerini Dimitri v. Yorgi’ye satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Büyük Kerasova nâm karye sâkinlerinden İsteryano v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Dimitri v. Yorgi nâm zimmî mahzarında bi’t-tav‘ ve’r-rızâ ikrâr edip karye-i merkūmede vâki‘ bir tarafdan Moris v. Todori mülküne ve bir tarafdan müşterî-i mezbûr Dimitri mülküne ve bir tarafdan vâdiye ve bir tarafdan tarîk-i âma müntehî ve mahdûd bir kıt‘a mülk bostan yerimi cümle-i tevâbi‘ ve levâhıkı ile mezbûr Dimitri’ye bin üç yüz nakd-i fıddî-i Osmânî râyic fi’l-vakt akçeye bey‘-i bât ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bostan yeri merkūm Dimitri’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Dimitri bi’l-muvâcehe tasdîk ve bi’l-müşâfehe tahkīk edicek ketb olundu. Hurrire fi’l-yevmi’l-hâmis min Zilhicceti’ş-şerîfe li târihi’l-mezbûr. Şuhûdü’l-hâl: Mustafa b. Mehmed, Yakub b. Kurd, Ali b. Abdullah, Perviz b. Abdullah, İsteryano [v.] Harito, Yorgi [v.] Dimitri, Yorgi [v.] Lambini, Hristo [v.] İsteryano.