Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 427 Hüküm no: 569 Orijinal metin no: [94a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Niko v. Duka’nın evini Süleyman b. Ali’ye satması Vilâyet-i Rumeli’nde Avlonya sancağında Ergirikasrı kazâsına tâbi‘ Bohola? nâm karye mahallâtından Laluşah mahallesi sâkinlerinden Niko v. Duka nâm zimmî meclis-i şer‘de işbu hâmilü’l-kitâb Süleyman b. Ali nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Rüstem b. Kasım mülküne ve bir tarafdan Hızır b. Ali mülküne ve iki tarafdan tarîk-i âma müntehî ve mahdûd bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ile mezbûr Süleyman’a dört bin nakd-i fıddî-i Osmânî râyic fi’l-vakt akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzil-i mahdûd merkūm Süleyman’ın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Süleyman bi’l-muvâcehe tasdîk edicek bi’t-taleb ketb olundu. Hurrire fî 17 min Zilhicceti’ş-şerîfe li târihi’l-mezbûr. Şuhûdü’l-hâl: Ali b. Abdullah, Perviz b. Abdullah, Koçi v. Dimo, Kiro v. Kondi, Göka v. Kondi, Duka v. Yorgi, Kirko v. Dirhibso, Niko v. Papa ve gayruhüm mine’l-hâzırîn.