Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 431 Hüküm no: 575 Orijinal metin no: [95a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Istabl-ı âmire için Hâslar kazâsından saman satın alınmasına dair ferman sureti Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki kıdvetü’l-emâcid ve’l-ekârim Arpa emîni -zîde mecduhû- südde-i sa‘âdetime mühürlü tezkire gönderip Istabl-ı âmire mühimmâtı için kantarı dörder akçe hesâbı üzre altı bin kantar saman tevzî‘ ve cem‘ ve tahsîl olunması lâzım ve mühim olduğunu i‘lâm eylemeğin olageldiği üzre tevzî‘ olunmak emrim olmuşdur buyurdum ki hükm-i şerîfimle kıdvetü’l-emâsil ve’l-akrân hâssa kürsüdâr -zîde kadruhû- vardıkda bir an ve bir sâ‘at te’hîr ve terâhî eylemeyip kazâ-i mezbûrda olan re‘âyâya zikr olunan mikdârı samanı olageldiği üzre tevzî‘ ve mu‘accelen cem‘ ve tahsîl ve mahallinde der-anbâr ettirmesine ikdâm ve ihtimâm eyleyesiz ve lâzım gelen akçesin mezbûr kulumdan alıp huzûrunda ashâb-ı hukūka bî-kusûr teslîm eyleyesiz saman husûsu akçe iledir tekâlîf-i örfiyyeden değildir ana göre mukayyed olup zikr olunan mikdârı samanı emrim üzre tevzî‘ ve cem‘ ve tahsîl ve mahallinde der-anbâr ettirip avk ve te’hîr olunmağla emr-i âhar irsâline muhtâc ettirmeyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis [min] şehri Ramazâni’l-mübârek li sene tis‘a ve ışrîn ve elf. Be makām-ı Kostantıniyye el-mahrûse.