Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 433 Hüküm no: 579 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cuhûd Burgaz köyünün vakıf olmasından dolayı tekâlîf-i örfiyeden muaf olduğuna dair ferman sureti Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki kazâ-i mezbûra tâbi‘ Cuhûd Burgazı nâm karyede binâsı fermânım olan câmi‘-i şerîfe karye-i merkūme vakıf ta‘yîn olunmağla içinde olan re‘âyâ tâifesi cümle tekâlîf-i örfiyyeden mu‘âf ve müsellem olmuşlar iken hâlâ çayır ve saman ve sâir tekâlîf teklîf ve taleb eyleyip rencîde ve remîde eyledikleri i‘lân olunmağın imdi Hazîne-i âmiremde mahfûz olan defterlere mürâca‘at olundukda Hâslar kazâsına tâbi‘ zikr olunan Cuhûd Burgaz nâm karye câmi‘-i şerîfe vakıf ta‘yîn olunduğu mastûr ve mukayyed bulunmağla karye-i mezbûre ahâlîsi hilâf-ı şer‘-i şerîf ve kānûn rencîde olunmaya deyû emr edip buyurdum ki hükm-i şerîfimle vardıkda bu bâbda sâdır olan fermân-ı celîlü’l-kadrim üzre amel edip dahi karye-i mezbûre zikr olunan câmi‘-i şerîfe vakıf ta‘yîn olunmuşdur min ba‘d ahâlîsi çayır ve saman ve sâir tekâlîf cem‘ine me’mûr olanlara ve âhardan bir ferde rencîde ve remîde ettirmeyesiz etmek isteyenleri men‘ ve def‘ edip men‘le memnû‘ olmayanları isimleri ve istişhâdları ve dirlikleri ile yazıp bildiresiz husûs-ı mezbûr için emr-i âhar irsâline muhtâc eylemeyesiz şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sânî ve’l-ışrîn min Recebi’l-ferd li sene tis‘a ve ışrîn ve elf. Be makām-ı Kostantıniyye el-mahrûse. Vusilet küllühâ fî 5 Şa‘bâni’l-mu‘azzam li sene tis‘a ve ışrîn ve elf.