Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 434 Hüküm no: 580 Orijinal metin no: [95b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahudi Burgazı köyünün Vidos köyü ile birlikte vakıf olduğuna dair ferman sureti Akzâ kuzâti’l-müslimîn evlâ vülâti’l-muvahhidîn yenbû‘ü’l-fazli ve’l-yakīn vârisü ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki Hâshâ-i İstanbul defterine tâbi‘ cizye defterlerinde altı hânesi olan Vidos nâm karye kurbunda cenâb-ı ni‘amü’l-me’âbım tarafından müceddeden binâsı fermânım olan câmi‘-i şerîfe hatt-ı hümâyûn-ı sa‘âdet-makrûnum ile vakıf ta‘yîn olunduğundan gayrı defter-i mezbûra tâbi‘ Yahudi Burgazı nâm karye ahâlîsinin dahi yirmi beş hâneleri olup lâkin fakīrü’l-hâl olmaları ile on beş hâneleri defterden aşağı varılıp bâkī kalan hâneleri kezâlik vakıf defterine kayd ve ilhâk olunmak üzre hatt-ı hümâyûn-ı sa‘âdet-makrûnum ile fermân-ı âlîşânım sâdır olmuşdur imdi mezbûr Vidos nâm karye ahâlîsi ile ma‘an iskân ettirildikden sonra âhardan kimesneye dahl ve ta‘arruz ettirilmeye deyû emr edip buyurdum ki hükm-i şerîfim vardıkda bu bâbda sâdır olan fermân-ı celîlü’l-kadrim mûcebince amel edip dahi zikr olunan karyeler ahâlîsi evkāf-ı mezbûre mütevellîsinden gayrı âhardan kimesneye dahl ettirmeyesiz böyle bilesiz ve ba‘de’n-nazar bu hükm-i hümâyûnumu ellerinde ibkā edip alâmet-i şerîfe i‘timâd kılasız. Tahrîren fi’l-yevmi’s-sânî min Recebi’l-ferd li sene [tis‘a ve ışrîn ve elf]. Be makām-ı Kostantıniyye el-mahrûse.