Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 434 Hüküm no: 581 Orijinal metin no: [96a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Koka ile kardeşi Hırsafi’nin ev hisselerini Niko v. Duka’ya satmaları Vilâyet-i Rumeli’nde Avlonya sancağında Ergirikasrı kazâsına tâbi‘ Sinaglo [Sinagopolos] nâm karye [sâkinlerinden] Yorgi v. Koka nâm zimmî kendi tarafından asâleten ve li ebeveyn kız karındaşı Hırsafi nâm nasrâniye menzil-i âti’l-beyânda olan hisse-i şâyi‘ayı bey‘a vekîl olup vekâleti hasm-ı şer‘î-i câhid mahzarında Pando v. Mikoli ve Duka v. Duka nâm zimmîler şehâdetleri ile sâbite oldukdan sonra meclis-i şer‘-i şerîfde işbu hâmil-i hâze’l-kitâb Niko v. Duka mahzarında ikrâr ve takrîr-i kelâm edip karye-i mezbûrede vâki‘ bir tarafdan müşterî-i merkūm mülküne ve bir tarafdan Kiro v. Nika mülküne ve bir tarafdan Mako v. Nika mülküne ve bir tarafdan arz-ı hâliyeye müntehî ve mahdûd iki tahtânî beyti ve bir zıllayı ve cüneyneyi ve zât-ı eşcâr-ı müsmire ve gayr-ı müsmireyi hâvî tahmînen iki çapalık bir kıt‘a bostan yerini müştemil olan mülk menzilden beş sehmin müvekkilem mezbûre ile bana intikāl eden üç sehmi, cümle-i tevâbi‘i ile merkūm Niko’ya altı bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân menzilde olan üç sehim hisse-i şâyi‘amız mezbûr Niko’nun mülk-i müşterâ-yı sarîhidir mutasarrıf olsun dedikde mukırr-ı mezbûrun bi’l-asâle ve’l-vekâle cârî olan ikrâr ve takrîrini el-mukarru lehü’l-merkūm Niko bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî 10 Muharremi’l-harâm sene selâsîn ve elf. Şuhûdü’l-hâl: Yani v. Mikoni, Yani v. Foçi, Arago v. Niko, Duka v. Dado.