Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 436 Hüküm no: 583 Orijinal metin no: [96a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa’nın sarayına aldığı suyun keşfinin yapılması Rumeli Beylerbeyisi Hasan Paşa suyu Sâbıkan ber vech-i tekā‘üd Rumeli Beylerbeyisi olup hâlâ atebe-i aliyye ve südde-i seniyyede bi’l-fi‘l başdefterdâr olan kā‘idu tekā‘üdi’l-izzeti’r-râsiha âkidu te‘âkudi’r-rif‘ati’ş-şâmiha vâzı‘u mevâzi‘i’l-hayrâti’l-mebrûre bânî mebâniyyi’l-hasenâti’l-mevfûre hüve’ş-şemsü kuddire ve’s-sudûr kevâkibü hüve’l-bahrü hakku zü’l-kirâm cedâvilü’l-mahfûf bi sunûfi’l-avâtıfi’l-meliki’l-a‘lâ Hazret-i Hasan Paşa -lâ zâlet âyâtü izzetin fî safahâti’l-eyyâm meştûreti ve dâbbâtü mecdihî fî sahâyifi’l-a‘vâm menşûre- hazretlerinin mahmiye-i İstanbul’da bi’l-fi‘l sâkin oldukları sarây-ı âmirelerine emr-i pâdişâhî ile idhâl için kazâ-i Havâss-ı Aliyye’ye tâbi‘ Cebeciköy nâm karye kurbunda âharın mülküne ittisâlden ârî Büyük Tepealtı demekle ma‘rûf mevzi‘-i hâlîyi hafr ettirip cem‘ eyledikleri mâyı menba‘dan kendi hâlis malları ile binâ buyurdukları mahalle karîb yerden firdevs-âşiyân merhûm Sultan Süleyman Hân -tâbe serâhu ve cu‘ile’l-cennetü mesvâhû- hazretlerinin câmi‘-i şerîflerine cereyân eden su yoluna ilhâk ve âdet-i me’lûfe üzerine cânib-i vakıf için hakk-ı mecrâ alıkonulandan mâ‘adâ mikdârı ma‘lûmları olmak murâd-ı şerîfleri olup hâlâ kıbel-i şer‘de husûs-ı mezbûru tahkīk için âdem irsâl olunmak taleb olundukda savb-ı şer‘den fahrü’l-müderrisîn mevlânâ Hidâyetullah müşârün-ileyh hazretlerinin âdemisi ve vekîl-i şer‘îsi olan kıdvetü’l-emâcid ve’l-a‘yân Piyâle Ağa b. Abdülmennân ile irsâl olunup bi’l-fi‘l suyolu nâzırı olan fahrü’l-a‘yân Hasan Ağa b. Abdurrahman ve hâssa suyolcularından Davud Çelebi b. Ali ve Mehmed Bey b. Mustafa zeyl-i kitâbda mastûrü’l-esâmî olan müslimîn ile mahall-i mezbûra vardıklarında zikr olunan mevzi‘de mevcûd olan mâ takdîr olundukda paşa-yı mûmâ-ileyh hazretlerinin bulup cem‘ ettirdiği suyun cümlesi kâmil üç masura su olduğunu bi’l-ittifâk tahkīk ettiklerinde mevlânâ-yı mezbûr mahallinde tahrîr ettikden sonra gelip meclis-i şer‘de alâ vukū‘ihî haber vermeğin vâki‘ hâl bi’t-taleb ketb ve terkīm olundu. Hurrire fi’l-yevmi’s-sânî aşer mine’l-Muharremi’l-harâm li sene selâsîn ve elf. Şuhûdü’l-hâl: Musa Bey b. Abdullah el-Cündî Mehmed b. Abdullah, Mustafa b. Abdullah, Mustafa b. Mehmed ve gayruhüm mine’l-hâzırîn.