Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 436 Hüküm no: 584 Orijinal metin no: [96b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın evini Mehmed b. Abdullah’a satıp tarlasının da tasarruf hakkını devretmesi Vilâyet-i] Rumeli’nde Arnavud Belgradı kazâsına tâbi‘ Tırnova nâm karye sâkinlerinden Hasan b. Abdullah nâm kimesne meclis-i şer‘-i şerîfde işbu hâmil-i hâze’l-kitâb Mehmed b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan Ali b. Rıdvan mülküne ve bir tarafdan Mustafa b. Abdullah mülküne ve bir tarafdan İstipo v. Koço mülküne ve bir tarafdan tarîk-i âma müntehî ve mahdûd bir tahtânî beyti ve cüneyneyi ve zât-ı eşcâr-ı müsmire ve gayr-ı müsmireyi hâvî hadîkayı ve bir kıt‘a bostan yerini müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Mehmed’e iki bin nakd-i fıddî râyic fi’l-vakt akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra yine karye-i merkūme sınırı dâhilinde mevâzi‘-i adîdede vâki‘ mutasarrıf olduğum ( ) kıt‘a tarlaların hakk-ı tasarrufunu sâhib-i arz ma‘rifetiyle merkūm Mehmed’e tefvîz edip ol dahi minvâl-i muharrer üzre tefevvüz ve kabûl eylediğinden sonra mukābele-i tefvîzde olan bin nakd-i mezbûrü’n-na‘t akçeyi merkūm Mehmed yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân menzil-i mahdûd merkūm Mehmed’in mülk-i müşterâ-yı sarîhidir ve mârrü’z-zikr tarlaların hakk-ı tasarrufu mersûmundur keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis aşer mine’l-Muharremi’l-harâm li târihi’l-mezbûr. Şuhûdü’l-hâl: Mustafa b. Hasan er-Râcil, Sinan b. Ali, Mehmed b. Mustafa, Mustafa b. Abdullah, Selim b. Osman, Sinan b. Osman, Mustafa b. Mehmed, Yakub b. Kurd ve gayruhüm mine’l-hâzırîn.