Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 447 Hüküm no: 602 Orijinal metin no: [99a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Todori’nin bağını Mihal v. İstemad’a satması Vilâyet-i Rumeli’nde kazâ-i Yenişehir müzâfâtından Fener nâhiyesine tâbi‘ Mizakiste nâm karyede Mihal v. Todori nâm zimmî meclis-i şer‘-i mutahharda, işbu râfi‘ü’l-kitâb Mihal v. İstemad muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre bağları dâhilinde Vaniçe nâm mevzi‘de vâki‘ bir tarafdan Yani v. Dimitri bağına ve bir tarafdan Yorgi v. Dimitri bağına ve bir tarafdan mezbûr Mihal bağına ve bir tarafdan dereye müntehî tahmînen altı çapalık bir kıt‘a mülk bağımı cümle-i tevâbi‘ ve levâhıkı ile merkūm Mihal’e iki bin iki yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bir kıt‘a bağ mesfûr Mihal’in mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûr Mihal bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî 22 min Zilhicceti’ş-şerîfe sene tis‘a ve ışrîn ve elf. Şuhûdü’l-hâl: Mustafa b. Mehmed, Yakub b. Kurd, Perviz b. Abdullah, Ali b. Abdullah, Şilyo v. Dimitri, Maskalyo v. İksari, Atanaş v. Mihal, Todori v. Yani, Şilo v. Mihal, Nikola v. Dimitri, Yani v. Yorgi, Mihal v. Todori, Mitro [v.] Todori, Todori v. Dimitri ve gayruhüm.