Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 446 Hüküm no: 601 Orijinal metin no: [99a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Todori’nin bağını Tanaş v. Aleksi’ye satması Kazâ-i Havâss-ı Aliyye müzâfâtından Çatalca nâhiyesine tâbi‘ Çakıl nâm karye sâkinlerinden Mihal v. Todori nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Tanaş v. Aleksi nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre bağları dâhilinde vâki‘ bir tarafdan Andon v. ( ) bağına ve bir tarafdan Mihal v. Andon bağına ve bir tarafdan İstemad v. Hariyo bağına ve bir tarafdan Yorgi v. Manol bağına müntehî eşcâr-ı müsmireyi hâvî tahmînen on ırgadlık bir kıt‘a mülk bağımı cümle-i tevâbi‘ ve levâhıkı ve âmme-i menâfi‘ ve merâfıkı ile merkūm Tanaş’a bin dokuz yüz nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân bir kıt‘a bağ mesfûr Tanaş’ın mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Tanaş bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min Zilhicceti’ş-şerîfe li târihi’l-mezbûr. Şuhûdü’l-hâl: Mustafa b. Mehmed, Yakub b. Kurd, Perviz b. Abdullah, Ali b. Abdullah, Kosta [v.] Manol, Yorgi [v.] Yani, Apostol [v.] Bıyıklı, Todori [v.] Mihal, Dimitri Fıçıcı ve gayruhüm mine’l-hâzırîn.