Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 452 Hüküm no: 611 Orijinal metin no: [100b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsiye bt. Hüdaverdi’nin bağını Mustafa b. Abdullah’a satması Havâss-ı Aliyye kazâsı müzâfâtından Terkos nâhiyesine tâbi‘ Çiftalan nâm karye sâkinelerinden Âsiye bt. Hüdaverdi nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Mustafa b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūme kurbunda vâki‘ bir tarafdan İskender Paşazâde mülküne ve bir tarafdan Mehmed b. ( ) mülküne ve bir tarafdan yine benim harmanıma ve bir tarafdan tarîk-i âma müntehî eşcâr-ı müsmire ve gayr-ı müsmireyi hâvî bir kıt‘a mülk bağımı cümle-i tevâbi‘ ve levâhıkı ile merkūm Mustafa’ya beş bin nakid akçeye bâtten bey‘ edip kabz-ı semen ve teslîm-i mebî‘ eyledim ba‘de’l-yevm sâlifü’l-beyân bir kıt‘a bağ merkūm Mustafa’nın mülk-i müşterâ-yı sarîhidir keyfe mâ yeşâ mutasarrıf olsun dedikde mukırra-i mezbûrenin minvâl-i muharrer üzre cârî olan ikrârını el-mukarru lehü’l-mezbûr Mustafa bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî 3 min Muharremi’l-harâm li sene selâsîn ve elf. Şuhûdü’l-hâl: Ahmed b. ( ), Mehmed b. Ahmed, Yusuf b. ( ), Kara Hasan b. ( ), İbrahim b. Selim, Veli Halîfe b. Mustafa, Ahmed b. Abdullah ve gayruhüm mine’l-hâzırîn.