Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 452 Hüküm no: 612 Orijinal metin no: [100b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî bt. Ferhad’ın ev yerini Abdülgani b. İbrahim’e satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Evlice Baba mahallesi sâkinelerinden Aynî bt. Ferhad nâm hâtun meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Abdülganî b. İbrahim nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ iki tarafdan yine benim mülküme ve bir tarafdan Kamer bt. Hüsameddin mülküne ve bir tarafdan tarîk-i âma müntehî ve mahdûd zât-ı eşcâr-ı müsmireyi hâvî bir kıt‘a mülk menzil yerimi cümle-i tevâbi‘ ve levâhıkı ve kâffe-i menâfi‘ ve merâfıkı ile merkūm Abdülganî’ye yedi yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim ba‘de’l-yevm sâlifü’l-beyân menzil yeri merkūm Abdülganî’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırra-i mezbûrenin minvâl-i muharrer üzre cârî olan ikrâr ve takrîrini el-mukarru lehü’l-mezbûr Abdülganî bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fî gurreti şehri Muharremi’l-harâm li sene selâsîn ve elf. Şuhûdü’l-hâl: Mahmud Efendi b. Mehmed el-Hatîb, Hasan Halîfe b. Abdullah el-Müezzin, Ali Beşe b. Ahmed er-Râcil, Hasan Dede b. Mehmed, Hüseyin b. Süleyman, Mehmed b. Abdullah, Nasuh b. Abdullah, Nuh Halîfe b. Mehmed, Osman Beşe b. Abdullah er-Râcil, el-Hâc Muharrem b. Abdullah, Perviz b. Abdullah, Ali b. Abdullah ve gayruhüm mine’l-hâzırîn.