Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 59 Hüküm no: 4 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kalender’in amca oğlu ve yanındakilerin öldürüldüğüne dair ihbarının asılsızlığı Da‘vâ-yı âti’l-beyânın mahallinde istimâ‘ı ve iktizâ ettiği üzre teftîş ve tefahhus olunması için dergâh-ı âlî -dâme mahfûfen bi’l-me‘âlî- çavuşlarından Osman Çavuş mübâşeretiyle Kalender nâm kimesne yedinden bu tarafa hitâben emr-i şerîf-i cihân-mutâ‘ vârid olmağın imtisâlen li’l-emri’l-me‘âlî merkūm Osman Çavuş ve cânib-i şer‘-i kavîmden mevlânâ Receb Efendi irsâl olunup ol dahi zeyl-i kitâbda mastûrü’l-esâmî olan müslimîn ile dergâh-ı âlî yeniçerilerinin ağası kāimmakāmı olan umdetü’l-emâcid ve’l-ekârim sekbanbaşı Mehmed Ağa tarafından dahi husûs-ı mezbûra mübâşir ta‘yîn olunan Havâss-ı Aliyye kazâsı müzâfâtından nâhiye-i Çatalca’da yeniçeri serdârı olan Mehmed Beşe ve hadâik-i sultâniyeden Çatalca hadîkası üstâdı Hasan Ağa tarafından irsâl olunan Ramazan Beşe ile Havâss-ı merkūme kazâsı müzâfâtından Silivri nâhiyesine tâbi‘ Köstemir ve Koryaş ve Mezidli nâm karyeler ve Çorlu kazâsına tâbi‘ Ermişe nâm karye ve Saray kazâsına tâbi‘ Beyceğiz nâm karye mâbeynlerinde Ahmed Fakīh pınarı demekle ma‘rûf umrândan ba‘îd ve hâlî mahalle varıp kurâ-i mezbûre ahâlîsini bi ecma‘ihim ihzâr edip akd-i meclis-i şer‘-i mutahhar ettiklerinde mezbûr Kalender meclis-i merkūmda ashâb-ı hâze’l-kitâb karye-i Köstemirli’den Mehmed Efendi el-İmâm ve Mustafa b. Ahmed ve Mehmed b. Abdullah ve Receb b. Musa ve Yusuf b. Abdullah ve Veli b. Mahmud ve Ali b. Arslan ve sâirleri ve karye-i Kutalmış’dan Mustafa Halîfe el-İmâm ve Ramazan b. Abdi ve İbrahim b. Mustafa ve Mehmed b. Osman ve Ahmed b. Mehmed ve sâirleri ve karye-i Mezidli’den Mehmed b. Durmuş ve İshak b. Mustafa ve Mustafa b. Abdullah ve sâirleri ve karye-i Ermişe’den Resûl b. Himmet ve Mustafa b. Ahmed ve sâirleri ve karye-i Beyceğiz’den İsmail b. Hasan ve Habib b. Mehmed ve Yusuf b. Abdullah nâm kimesneler ve sâirleri muvâcehelerinde üzerlerine takrîr-i da‘vâ ve tasvîr-i müdde‘â edip târih-i kitâbdan üç ay mukaddem li ebeveyn ammim Nasreddin nâm kimesnenin oğulları ve mûrislerim olan Ebûbekir ve Kalender ve Kulak Ahmed nâm kimesneleri ve Osman b. Mehmed ve Musa b. Mehmed ve İsmail b. Sinan nâm refîkleri ile İstanbul’dan Zağra-i Atîk tarafına giderken mahall-i mezbûrda Ahmed Fakīh pınarına gelip nüzûl eylediklerinde zikr olunan altı nefer âdemi kurâ-i mezbûre ahâlîsinden bir kaç nefer âdem katl edip emvâl ve erzâklarını gāret eylemişlerdir, ber mûceb-i emr-i âlî teftîş ve tefahhus ve mezbûrlardan suâl olunup şer‘an ihkāk-ı hak olunmak matlûbumdur dedikde gıbbe’s-suâl kurâ-i mezkûre ahâlîsinden mastûrü’l-esâmî olan kimesneler ve sâirleri cevâblarında mahall-i merkūmda minvâl-i muharrer üzre âdem katl olunduğu ma‘lûmumuz değildir mesmû‘umuz dahi olmamışdır ve bu etrâfda âdem katl olunduğundan kimesnenin haber ve âgâhı yokdur deyû husûs-ı mezbûru bi’l-külliye inkâr ile cevâb vericek müdde‘î-i mezbûrdan da‘vâsına mutâbık beyyine taleb olunup mehil-i şer‘î ile imhâl olundukdan sonra karye-i mezbûre ahâlîsi kemâ yenbağī bir kaç gün dikkat ve ihtimâm üzre teftîş ve tefahhus olunup mahall-i merkūmda vech-i merkūme üzre âdem katl olunduğundan ve devâb ve eşyâlardan ve bi’l-cümle müdde‘î-i mezbûrun da‘vâsı üzre mahall-i merkūmun etrâf ve eknâfından zikr olunan kimesnelerin kıtâllerine istidlâl olunacak alâimden bir şey zuhûr etmeyip müdde‘î-i merkūm dahi ityân-ı beyyineden izhâr-ı acz etmeğin kurâ-i merkūme ahâlîsi üzerlerine minvâl-i muharrer üzre olan da‘vâsından bi’l-külliye ferâğ eylediğini mevlânâ-yı mezbûr mahallinde ketb ve tahrîr ba‘dehû gelip meclis-i şer‘de vukū‘u üzre ihbâr ve takrîr etmeğin mâ hüve’l-vâki‘ gıbbe’t-taleb ketb olundu. Hurrire fî evâili Cemâziyelevvel li seb‘a ve erba‘în ve elf. Şuhûdü’l-hâl: Mehmed b. Abdullah, İskender b. Abdullah, Ahmed Beşe b. Mehmed, Bekir Bey b. Abdi, Mehmed b. Süleyman, Ahmed b. Mehmed, Mustafa b. Mehmed, Mehmed b. Bâli, Kulak Mehmed b. ( ), Ebûbekir Bey Nasrullah, Ramazan b. Mehmed, Hasan Mehmed, Mustafa b. Kalender, Mehmed b. Abdülkādir, Ali b. Mehmed, Abbas b. İskender, Ali b. Ahmed, Hasan b. İskender.