Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 60 Hüküm no: 5 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Dimo’nun bağını Yani v. Minho’ya sattığı Vilâyet-i Rumeli’nde Aydonat kasabasına tâbi‘ Ordızova nâm karye sâkinlerinden İstati v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Yani v. Minho nâm muvâcehesinde bi’t-tav‘i’s-sâf ikrâr ve i‘tirâf edip karye-i mezbûre sınırı dâhilinde vâki‘ bir tarafdan Yani v. Pavlo bağı ve bir tarafdan Nikola v. Kalo bağı ve bir tarafdan Ermeni tarlası ve bir tarafdan tarîk-i âm ile mahdûd ve mümtâz bir kıt‘a mülk bağı, mezbûr Yani’ye fıddî nakd-i râyic fi’l-vakt bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr bin akçeyi mezbûr Yani yedinden bi’t-tamâm ve’l-kemâl ahz ve kabz edip mebî‘-i mezbûru mahallinde zabt ve tasarrufa mezbûr Yani’yi taslît eyledim ba‘de’l-yevm zikr olunan bağ mezbûr Yani’nin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı mezbûr İstati’nin minvâl-i muharrer üzre cârî olan ikrârını el-mukarru lehü’l-merkūm Yani vicâhen tasdîk ve şifâhen tahkīk edicek mâ vaka‘a gıbbe’t-taleb ketb olundu. Tahrîren fi’l-yevmi’s-sâdis min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa b. Veli, Yakub [b.] Kurd, Cafer b. Abdullah, Rizo v. İstati, Dimo [v.] Yani, Nikola v. Todori.