Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 61 Hüküm no: 6 Orijinal metin no: [1b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkerim b. Mehmed’in karısı Siyavuş bt. Abdullah’ın mirastan hakkını alması Medîne-i Hazret-i Ebî Eyyûb el-Ensârî mahallâtından Davud Ağa mahallesinde sâkin iken bundan akdem müteveffâ olan Abdülkerim b. Mehmed nâm kimesnenin zevce-i metrûkesi Siyavuş bt. Abdullah nâm hâtun meclis-i şer‘-i hatîr-i lâzımü’t-tevkīrde bundan akdem müteveffât olup sulbiye kızı Âişe’nin ve müteveffâ-yı mezbûrun muhallefâtlarına vâzı‘atü’l-yed olan sulbiye kızı Fâtıma nâm hâtun tarafından ikrâr-ı âti’z-zikri tasdîka vekîl olup bimâ hüve nehcü’s-sübût şer‘an vekâleti sâbite olan mezbûre Fâtıma’nın zevci Yusuf Çelebi b. Halil mahzarında [1(2)a] bi tav‘ihâ ikrâr ve i‘tirâf edip zevcim müteveffâ-yı mezbûr Abdülkerim zimmetinde mütekarrir olan iki bin akçe mehr-i müeccelimi ve terekesinden bi hasebi’l-irsi’ş-şer‘î bana isâbet eden sümün hisse-i şer‘iyyemi kızım mezbûre Fâtıma yedinden bi’t-tamâm ve’l-kemâl ahz ve kabz eyledim ba‘de’l-yevm zevcim müteveffâ-yı mezbûr Abdülkerim’in ve kızım müteveffât-ı mezbûre Âişe’nin mîrâsına müte‘allik kızım mezbûre Fâtıma ile vechen mine’l-vücûh da‘vâ nizâ‘ım yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-hâmis min Cemâziyelevvel li sene seb‘a ve erba‘în ve elf. Şuhûdü’l-hâl: El-Hâc Davud b. Mehmed, Abdurrahman Çelebi b. Habib, Alemüddin Halîfe b. Süleyman, İbrahim Çelebi b. Mustafa, Mustafa b. Yusuf el-Müezzin, Mustafa b. Süheyl, Sefer Halîfe b. Veli el-İmâm, Hasan Efendi b. Abdi el-İmâm, Abdülkerim b. Mehmed ve gayruhüm.