Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 61 Hüküm no: 8 Orijinal metin no: [1(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman b. Ali ve kız kardeşi Rabia’nın evlerini sattığı Medîne-i Hazret-i Ebî Eyyûb el-Ensârî mahallâtından Nişancı mahallesinde sâkin Abdurrahman b. Ali nâm kimesne asâleten ve li ebeveyn kız karındaşı Râbia bt. Ali nâm hâtun tarafından bey‘-i âti’z-zikri ve kabz-ı semeni ikrâra vekîl olup vekâleti mezbûre Râbia’yı ma‘rifet-i şer‘iyye ile ârifeyn olan Ramazan Halîfe b. Hüseyin el-Müezzin ve İnâyetullah Efendi b. Gāzi el-Müsta‘id şehâdetleri ile sâbite olan Abdurrahman Efendi b. eş-Şeyh Musa el-İmâm meclis-i şer‘-i hatîr-i lâzımü’t-tevkīrde işbu hâmilü’l-kitâb Ahmed Çelebi b. Cafer kendi tarafından asîl ve li ebeveyn karındaşları Mustafa ve Hüseyin nâm kimesneler taraflarından şirâ-i âti’z-zikre bimâ hüve nehcü’s-sübût şer‘an sâbitü’l-vekâle vekîl olduğu hâlde mahzarında her biri bi’l-asâle ve bi’l-vekâle ikrâr ve i‘tirâf edip mahalle-i mezbûrede vâki‘ bir tarafdan yine kendi mülkümüz ve bir tarafdan mahalle-i mezbûre imâmına meşrûta olan vakıf menzil ve bir tarafdan Ahmed Efendi mülkü ve bir tarafdan tarîk-i âm ile mahdûd olup hâriciyye ta‘bîr olunur babamızdan irs-i şer‘î ile intikāl eden iki bâb tahtânî beyti ve bi’r-i mâyı ve kenîfi ve muhavvatayı ve zât-ı eşcâr-ı müsmireyi müştemil mülk menzilimizi, cümle tevâbi‘ ve levâhıkıyla mezbûrûn Ahmed Çelebi ve Mustafa ve Hüseyin’e ale’l-iştirâki’s-seviy fıddî nakd-i râyic fi’l-vakt yirmi beş bin akçe ile hîn-i akidde müşârün-ileyh[in] olup ba‘de’l-kabz mudî‘a-i âded-i nâ-ma‘lûm bir kabza fülûsa bey‘-i bâtt-ı sahîh-i şer‘î ile bey‘ edip onlar dahi vech-i meşrûh üzre iştirâ ve kabûl eyledikden sonra kabz-ı semen-i ma‘dûd ve teslîm-i mebî‘-i mahdûd eyledik. Ba‘de’l-yevm zikr olunan menzil mezbûrûn Ahmed Çelebi ve Mustafa ve Hüseyin’in ale’l-iştirâki’s-seviy mülk-i müşterâları olmuşdur, keyfe mâ yeşâ’ûn ve yahtârûn mutasarrıf olsunlar dediklerinde mukırrân-ı mezbûrân Abdurrahman ve diğer Abdurrahman Efendi’nin bi’l-asâle ve bi’l-vekâle cârî olan ikrârlarını el-mukarru lehü’l-mezbûr Ahmed Çelebi asâleten ve vekâleten tasdîk ve tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sâbi‘ min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa b. Muharrem, Cafer b. Muharrem, Abdülkādir b. Hızır, Mehmed b. Abdullah, Abdullah b. Sefer, el-Hâc Bayram b. ( ), Ahmed b. Durmuş, Hasan Çelebi b. Ahmed Efendi, Ahmed Çelebi b. ( ), Hüseyin Ağa b. Abdullah, Mehmed Ağa b. Abdullah, Bıyıklı Mehmed, Ahmed b. Mehmed.