Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 62 Hüküm no: 9 Orijinal metin no: [1(2)a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Uğurlu Mustafa Çavuş’un borcunun terekesinden ödenmesi Dergâh-ı âlî -dâme mahfûfen bi’l-me‘âlî- çavuşlarından Eyüb Çavuş b. Mehmed meclis-i şer‘-i hatîr-i lâzımü’t-tevkīrde Hazret-i Ebî Eyyûb el-Ensârî mahallâtından Zal Mahmud Paşa mahallesinde sâkin iken müteveffâ olup zevce-i metrûkesi işbu hâzıre bi’l-meclis olan Nâzenin bt. Abdullah nâm hâtundan gayrı vâris-i ma‘rûfu olmamağla terekesinin rub‘u mezbûre Nâzenin’e ve sülüs erbâ‘ı beytülmâle râci‘ olan Uğurlu Mustafa Çavuş’un zevce-i metrûkesi mezbûre Nâzenin ve medîne-i mezbûrede bi’l-fi‘l beytülmâl emîni olan Mustafa Ağa b. Abdullah mahzarında üzerine takrîr-i da‘vâ edip müteveffâ-yı mezbûr Mustafa Çavuş târih-i kitâbdan iki ay mukaddem karz-ı şer‘î tarîki ile on iki riyâlî guruş ve iki esedî guruş ve bin üç yüz hurda akçe ki cem‘an iki bin dokuz yüz seksen akçe verip teslîm eylemiş idim kable’l-edâ mezbûr Mustafa Çavuş müteveffâ olmuşdur, terekesine vâzı‘ü’l-yed oldukları ecilden mezbûrân Nâzenin ve Mustafa Ağa’dan taleb ederim bi hasebi’ş-şer‘î suâl olunup alıverilmek matlûbumdur dedikde gıbbe’s-suâl akībe’l-inkâr müdde‘î-i mezbûr Eyüb Çavuş’un müdde‘âsına mutâbıka beyyine taleb olundukda udûl-i müslimînden el-Hâc Ahmed b. Mustafa ve Ali b. Ebûbekir nâm kimesneler li ecli’ş-şehâde meclis-i şer‘a hâzırân olup istişhâd olunduklarında her biri edâ-i şehâdet-i şer‘iyye edip fi’l-vâki‘ müdde‘î-i mezbûr Eyüb Çavuş târih-i kitâbdan iki ay mukaddem bizim huzûrumuzda müteveffâ-yı mezbûr Uğurlu Mustafa Çavuş’a alâ tarîki’l-karz on iki riyâlî guruş ve iki esedî guruş ve bin üç yüz kırk hurda akçe ki cem‘an iki bin dokuz yüz seksen vermişdir biz bu husûsa şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle oldukdan sonra müdde‘î-i mezbûr Eyüb Çavuş meblağ-ı mezbûr iki bin dokuz yüz seksen akçeyi müteveffâ-yı mezbûr Mustafa Çavuş tarafından küllen ve ba‘zan ahz ve istîfâ etmediğine ve tarîk-i şer‘iyyeden bir tarîkle müteveffâ-yı mezbûrun zimmetini ibrâ eylemediğine yemîn teklîf olunup ol dahi alâ vefki’l-mes’ûl yemîn billâhi’l-aliyyi’l-azîm etmeğin meblağ-ı mezbûr iki bin dokuz yüz seksen akçeyi müteveffâ-yı mezbûr Mustafa Çavuş metrûkâtından müdde‘î-i mezbûra [1(2)b] edâ etmeye mezbûrân Nâzenin ve Mustafa Ağa’ya tenbîh olunup mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Alemüddin Efendi b. Süleyman el-İmâm, Ali b. Mustafa, Kasım Çelebi el-Kâtib, İlyas Çelebi. b. Nasuh, Mustafa b. Veli, Yakub b. Kurd.