Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 203 Hüküm no: 186 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın evini Musa Beşe b. Hasan’a sattığı ve alacağından bir kısmını borcuna takas ettiği Mahmiye-i İstanbul’da Dülgerzâde mahallesinde sâkin Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb Musa Beşe b. Hasan nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahmiye-i mahkiyede Nişancı Paşa-yı Atîk kurbunda Sarrâcbaşı İshak Bey mahallesinde vâki‘ bir tarafından Karakaş v. Marat nâm zimmî mülkü ve bir tarafdan Torfende nâm nasrâniye mülkü ve bir tarafdan Hamamcı Ömer Ağa mülkü ve bir tarafdan tarîk-i âm ile mahdûd bir bâb fevkānî oda ve bir bâb tahtânî oda ve bir mahzen ve bir su kuyusunu müştemil menzilimi cümle hukūk ve merâfıkı ile merkūm Musa Beşe’ye iki yüz elli kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl ve kabz eyledikden sonra semeni olan meblağ-ı mezbûr iki yüz elli guruş müşterî-i merkūm Musa Beşe’ye cihet-i kefâletden deynim olan üç yüz esedî guruşun iki yüz elli guruşuna takās edip ol dahi mukāssa ve kabûl eyledi ba‘de’l-yevm menzil-i mahdûd-ı mezkûr merkūm Musa Beşe’nin mülk-i müşterâsıdır keyfe mâ yeşâ’ ve yahtâr tasarruf eylesin dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min Cemâziyelevvel li sene seb‘a ve seb‘în ve elf. Şuhûdü’l-hâl: Mehmed Beşe b. Ser-oda-i 26. C[emâ‘at], Hacı Ahmed b. Mustafa, Ahmed Beşe b. Abdüsselâm, Keçeci Yakub, Mehmed Çelebi b. ( ).