Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 204 Hüküm no: 187 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe b. Ali’nin Ali Beşe b. Mehmed’in tüfekle kulağından vurup yaralamasıyla ilgili davada sulh olduğu Dergâh-ı âlî -dâme merci‘an li’l-e‘âlî yeniçerilerinin kırk dokuzuncu cemâ‘ati yoldaşlarına mahsûs oda yoldaşlarından Hüseyin Beşe b. Ali nâm kimesne tarafından husûs-ı câ’i’l-beyâna vekîl olduğu es-Seyyid Ahmed Efendi b. es-Seyyid Cafer ve Sarrâc Mustafa Çelebi b. Mahmud nâm kimesneler şehâdetleriyle şer‘an sâbite olan fahrü’l-akrân odabaşı Mehmed b. Süleyman meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda bâ‘isü’l-kitâb Ali Beşe b. Mehmed nâm kimesnenin anasının anası ve tarafından husûs-ı âti’l-beyâna vekîli olduğumuza Bekir Beşe b. Ömer ve Abdülbâkī Beşe b. Mehmed nâm kimesneler şehâdetleri ile şer‘an sâbit olan Nesli Hâtun bt. Sevindik mahzarında ikrâr ve takrîr-i kelâm edip müvekkil-i mezbûr Ali Beşe târih-i kitâbdan on dört gün mukaddem medîne-i Edirne’den İstanbul’a gelir iken Küçük Çekmece kurbunda Taşlık nâm mevzi‘de araba içinden tüfenk atıp kurşunu ile müvekkilim mezbûr Hüseyin Beşe’nin kulağı tozuna vurup cerh etmeğin bundan akdem müvekkil-i mezbûr Ali Beşe’den mûcebini da‘vâ eylediğinde muslihûn tavassut edip müvekkilim mezbûr Hüseyin Beşe ile beynlerinde yirmi üç kıt‘a esedî guruş üzre inşâ-i akd-i sulh ettiklerinde ol dahi sulh-i mezbûru kabûl ve bedel-i sulh olan meblağ-ı mezkûr yirmi üç kıt‘a esedî guruşu tamâmen yedinden alıp kabz edip da‘vâ-yı mezbûresinden ve ol cerhden nâşî ve hâdis olacak şeyden müvekkil-i mezbûr Ali Beşe’yi ibrâ-i âmm-ı kātı‘ü’n-nizâ‘ ile ibrâ eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Ali Çavuş b. Mahmud sekbânân-ı 34. [bölü]k, el-Hâc Hasan b. Ali bölük-i 43, el-Hâc Hasan Beşe b. Ali 43. [bölü]k, Mehmed Beşe b. Mustafa Ser-oda, Sarrâc Muharrem b. Sefer.