Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 73 Hüküm no: 26 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Duka v. Menküli’nin ev ve bostan yerini Bâli Çavuş b. Abdülmennân’a sattığı Vilâyet-i Rumeli’nde Ergirikasrı kazâsına tâbi‘ Sanagoplu nâm karye sâkinlerinden Duka v. Menküli nâm zimmî meclis-i şer‘-i hatîr-i lâzımü’t-tevkīrde fahrü’l-cüyûş Bâli Çavuş b. Abdülmennân tarafından husûs-ı âti’z-zikri tasdîka vekîl olup bimâ hüve nehcü’s-sübût şer‘an vekâleti sâbite olan Kiko v. Papa Dimo nâm zimmî muvâcehesinde bi’t-tav‘ ikrâr ve i‘tirâf edip karye-i mezbûrede vâki‘ bir tarafdan Yorgi v. Menküli mülkü ve bir tarafdan Niko v. Dimo mülkü ve iki tarafdan tarîk-i âm ile mahdûd ve mümtâz mülk menzilimi ve lede’l-ahâlî ma‘lûmü’l-hudûd olup eşcâr-ı müsmire ve gayr-ı müsmireyi müştemil olan mülk bostan yerimi, mezbûr Bâli Çavuş’a on üç bin üç yüz akçeye bey‘ bi’l-vefâ ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr on üç bin üç yüz akçeyi mezbûr Bâli Çavuş yedinden tamâmen alıp kabz eyledim eğer meblağ-ı mezbûr on üç bin üç yüz akçeyi târih-i kitâbdan yüz seksen gün tamâmına değin edâ etmezsem bey‘-i mezbûr bâtta münkalib olup menzil-i mezkûr ve bostan-ı mezbûr merkūm Bâli Çavuş’un mülk-i mahzı olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene seb‘a ve erba‘în ve elf. Şuhûdü’l-hâl: Es-Sâbikūn.