Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 72 Hüküm no: 25 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Duka v. Menküli’nin bağını Kiro ve Duka v. Dido’ya sattığı Vilâyet-i Rumeli’nde Ergirikasrı kazâsına tâbi‘ Sanagoplu nâm karye sâkinlerinden Duka v. Menküli nâm zimmî meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden işbu râfi‘ü’l-kitâb Kiro ve Duka veledey Dido nâm zimmîler muvâcehelerinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Yorgi v. Menküli mülkü ve bir tarafdan Duka v. Dimo tarlası ve bir tarafdan kendi harman yerim ve bir tarafdan arsa-i hâliye ile mahdûd ve mümtâz eşcâr-ı müsmireyi müştemil tahmînen on beş çapalık mülk bağımı mezbûrân Kiro ve Duka’ya fıddî nakd-i râyic fi’l-vakt üç bin iki yüz akçeye bey‘ bi’l-vefâ ile bey‘ edip onlar dahi vech-i meşrûh üzre iştirâ ve kabûl eyledikden sonra semen-i mezbûr üç bin iki yüz akçeyi mezbûrân Kiro ve Duka yedlerinden bi’t-tamâm ahz ve kabz eyledim eğer meblağ-ı mezbûr üç bin iki yüz akçeyi târih-i kitâbdan üç yüz altmış gün tamâmına değin edâ etmez isem bey‘-i mezbûr bâtta münkalib olsun zikr olunan bağ mezbûrân Kiro ve Duka’nın mülk-i mahzları olsun dedikde gıbbe’t-tasdîki’ş-şer‘î mâ hüve’l-vâki‘ ketb olundu. Fi’l-yevmi’r-râbi‘ aşer min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa b. Veli, Ali b. Mustafa, Cafer b. Osman, Kiro v. Miro, Kiro v. Menküli, Keto v. Dido, Nikola v. Malo, Nikola v. Duka, Kiko v. Papa Dimo, Kiti [v.] Roka, Yorgi [v.] Dimo ve gayruhüm.