Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 75 Hüküm no: 30 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi ile Mehmed Çelebi b. Mustafa’nın mahsul davasında sulh oldukları Zümre-i râcilînden Ali Çelebi b. ( ) mahfil-i kazâda işbu râfi‘ü’l-kitâb zahrü’l-emsâl Mehmed Çelebi b. Mustafa mahzarında ikrâr ve i‘tirâf edip bundan akdem mezbûr Mehmed Çelebi ile ber vech-i iştirâk kendi tarlasına hınta zer‘ etmişidik hasada geldikde altmış altı araba demedden hâsıl olan üç yüz seksen keyl hınta ve samandan mezbûr Mehmed Çelebi ve bi hasebi’l-iştirâk hissem olan hınta ve samanı taleb eylediğimde cem‘an üç yüz keyl hınta ve on dört çit saman ikrâr edip ikrârı mûcebince zikr olunan üç yüz keyl hınta ve on dört çit samandan bundan akdem yüz on dört [keyl] hıntayı mezbûr Mehmed Çelebi’ye olan dört bin beş yüz altmış akçe deynim mukābelesinde her keyli kırkar akçeye olmak üzre bey‘ ve semenini takās eylediğimden sonra ikrârı üzre bâkī kalan otuz dört keyl hınta ve yedi çit samanı ve iddi‘â eylediğim üzeri ziyâdeyi dahi da‘vâ ve taleb eylediğimde ol dahi benden dört bin akçe da‘vâ edip beynimizde münâza‘ât-ı şedîde vâkı‘a olmuşidi el-hâletü hâzihî muslihûn tavassut edip mâbeynimizi iki bin beş yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı merkūm iki bin beş yüz akçeyi merkūm Ahmed Çelebi yedinden bi tamâmihî alıp kabz eyledim ba‘de’l-yevm husûs-ı mezbûra müte‘allik da‘vâ ve talebden merkūm Mehmed Çelebi’nin zimmetini ibrâ eyledim eğer min ba‘d benden bi’l-asâle ve bi’l-vekâle husûs-ı merkūm için da‘vâ ve taleb sudûr ederse lede’l-hükkâm mesmû‘a olmaya dedikde mukırr-ı merkūm alâ hâlihî ikrâr-ı meşrûhunu el-mukarru lehü’l-merkūm Mehmed Çelebi vicâhen ve şifâhen [tasdîk] eyledikden sonra merkūm Ali Çelebi dahi zikr olunan dört bin akçe da‘vâsından mezbûr Ali Çelebi’nin zimmetini ibrâ edicek mâ hüve’l-vâki‘ gıbbe’t-taleb ketb olundu. Hurrire fî evâsıtı Cemâziyelevvel li sene seb‘a ve erba‘în ve elf. Şuhûdü’l-hâl: Zahrü’l-etıbbâ Ahmed Efendi Tabîb-i sultânî, sahhâf Hızır Efendi b. Zeyneddin, sahhâf Mehmed Efendi, el-Hâc Hüseyin b. Hasan, İbrahim Çelebi b. Mehmed, Ali ( ).