Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 76 Hüküm no: 31 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mustafa ile kardeşi Mehmed arasındaki miras meselesi Medîne-i Hazret-i Ebî Eyyûb el-Ensârî mahallâtından Takyecibaşı mahallesinde sâkin Ahmed b. Mustafa nâm kimesne mahfil-i kazâda karındaşı Mehmed nâm kimesne muvâcehesinde ikrâr ve takrîr-i kelâm edip bundan akdem müteveffât olan vâlidem Âişe nâm hâtunun metrûkâtından olmak üzre karındaşım mezbûr Mehmed’den bir kırmızı atlas kaftan iddi‘â edip ol dahi vâlidem müteveffât-ı merkūme Âişe Hâtun bana hâl-i hayâtında hibe ve temlîk ve teslîm eylemiş idi deyû cevâb verip beynimizde münâza‘ât-ı kesîre ve muhâsamât-ı adîde vâki‘ olmuşidi el-hâletü hâzihî zikr olunan kaftan da‘vâsından ve bi’l-cümle vâlidem müteveffât-ı mezbûre metrûkâtına müte‘allik da‘vâ-yı husûmâtdan karındaşım mezbûr Mehmed’in zimmetini ibrâ eyledim ba‘de’l-yevm husûs-ı mezbûra müte‘allik benden bi’l-asâle veya vekîlimden bi’l-vekâle da‘vâ ve taleb sudûr ederse lede’l-hükkâmi’l-kirâm mesmû‘a ve makbûle olmaya dedikden sonra mezbûr Mehmed dahi meclis-i şer‘de vâlidem müteveffât-ı merkūmenin metrûkâtına müte‘allik mezbûr Ahmed ile da‘vâ ve nizâ‘ım yokdur deyicek her biri âharın vech-i meşrûh üzre cârî olan ikrârını bi’l-muvâcehe tasdîk ve bi’l-müşâhede tahkīk edicek mâ vaka‘a bi’t-taleb ketb olundu. Hurrire fi’l-yevmi’s-sâdis aşer min Cemâziyelevvel li sene seb‘a ve erba‘în ve elf. Şuhûdü’l-hâl: Derviş Çelebi b. Ramazan, Ahmed Beşe b. Ahmed, İsmail b. ( ), Mahmud b. İvaz, Mehmed b. Abdi, Murad b. Abdullah, Mustafa b. Mehmed, Kalender b. Süleyman, Ramazan b. Durmuş, el-Hâc Sübhânverdi b. Mehmed.