Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 78 Hüküm no: 33 Orijinal metin no: [4a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Paşa Vakfı’nın eski mütevellisi Mehmed Çelebi b. Mehmed’in vakfa borçlu olduğu Medîne-i Hazret-i Ebî Eyyûb el-Ensârî’de vâki‘ merhûm Cafer Paşa vakfı’na sâbıkan mütevellî olan Çene Mehmed Çelebi b. Mehmed mahfil-i kazâda vakf-ı mezbûra hâlâ mütevellî olan râfi‘ü hâze’l-kitâb Mehmed Beşe b. Hamza muvâcehesinde bi tav‘ihî ikrâr ve i‘tirâf edip vakf-ı mezbûre merkūm Mehmed Beşe berât-ı âlîşân ile mütevellî olmağla mâl-ı vakf-ı mezbûru mütevellî-i mezbûra teslîm eylediğimde asl-ı mâl-ı vakıfdan zimmetimde elli beş [bin] dört yüz akçe zuhûr edip [4b] hâlâ beş bin akçesini mütevellî-i mezbûra edâ edip zimmetimde elli bin dört yüz akçe kalmışdır meblağ-ı mezbûr elli bin dört yüz akçe ki te’kîden li aslihî ve tavzîhan li küllihî nısfı yirmi beş bin iki yüz akçe eder vakf-ı mezbûra vâcibü’l-edâ lâzımü’l-kazâ deynimdir dedikde mütevellî-i sâbık Mehmed Çelebi’nin ikrâr-ı meşrûhunu mütevellî-i cedîd Mehmed Beşe vicâhen tasdîk ve şifâhen tahkīk edicek mâ hüve’l-vâki‘ hıfzan li’l-makāl ketb olundu. Hurrire fi’l-yevmi’s-sâdis aşer min Cemâziyelevvel li sene seb‘a ve erba‘în ve elf. Şuhûdü’l-hâl: Mehmed Beşe b. Abdullah, Mustafa Çelebi b. Ali, Veli Halîfe b. İsa el-Kâtib, Mustafa Çelebi b. Hasan, Mustafa Ağa b. Süleyman Çelebi, Osman Çelebi b. ( ), Mustafa b. Süheyl el-Kayyım, Sefer Halîfe b. Veli el-İmâm, Cafer b. Abdullah ve gayruhüm.