Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 77 Hüküm no: 32 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdullah’ın ev bağ ve tarlaların kendine ait hissesini Mehmed Beşe b. Hüseyin’e sattığı Vilâyet-i Rumeli’nde Opar kazâsına tâbi‘ Düşehri nâm karye sâkinlerinden Hasan Beşe b. Abdullah nâm kimesne mahfil-i kazâda li ebeveyn karındaşı oğlu hâmil-i hâze’l-kitâb Mehmed Beşe b. Hüseyin mahzarında ikrâr-ı tâm ve takrîr-i kelâm edip karye-i merkūmede vâki‘ bir tarafı Aydınoğulları mülkü ve bir tarafı Seferoğulları tarlası ve bir tarafı dere ve bir tarafı tarîk-i âm ile mahdûd ve bir bâb tahtânî odası ve çardağı ve muhavvatayı müştemil olan mülk menzilimin nısf-ı şâyi‘ini ve hudûd-ı mezbûre dâhilinde vâki‘ tahmînen üç dönüm mülk bostanımın dahi nısf-ı şâyi‘ini ve yine kazâ-i mezbûreye tâbi‘ Hırsovi nâm karye arâzisinde vâki‘ bir tarafı Ali b. Kasım bağı ve bir tarafı Osman b. Mehmed bağı ve bir tarafı Aydın b. Hızır bağı ve bir tarafı dere ile mahdûd tahmînen sekiz çapalık bir kıt‘a mülk bağımın dahi nısf-ı şâyi‘ini [ve] beynimizde ma‘lûm bir re’s kara sığır öküzünü ve bir re’s sarı erkek katırımı mezbûr Mehmed Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘i ile altı bin nakd-i râyic fi’l-vakt fıddî akçeye bey‘ edip ol dahi iştirâ ve kabûl eyledikden sonra karye-i mezbûre Düşehri sınırında mevâzi‘-i adîdede vâki‘ her biri inde’l-cîrân ma‘lûmü’l-hudûd olan yirmi kıt‘a tarlalarımın dahi nısf-ı şâyi‘inin hakk-ı tasarrufunu sâhib-i arz ma‘rifetiyle mezbûrü’n-na‘t iki bin akçe mukābelesinde tefvîz edip ol dahi tefevvuz ve kabûl eylediğinden sonra mukābele-i tefvîzde olan iki bin akçe ile emlâk-i mezbûrenin semeni olan altı bin akçe ki cem‘an sekiz bin akçe eder mezbûr Mehmed Beşe’nin yedinden bi’t-tamâm ahz ve kabz eyleyip emlâk-i mezbûreyi mahallinde zabt ve teslîme ve mezâri‘-i mezbûreyi zabt ve tasarrufa müşterî-i mezbûr Mehmed Beşe’yi taslît eyledim dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’l-hâmis min Cemâziyelevvel li sene seb‘a ve erba‘în ve elf. Şuhûdü’l-hâl: İbrahim Beşe b. Mehmed, Sinan Beşe b. Abdullah, Ali Beşe b. Sefer, Hasan Beşe b. Abdullah, Mehmed Beşe b. ( ), Hasan b. İbrahim, Ali b. Hamza, Mustafa b. Ali.