Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 79 Hüküm no: 35 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un evini Kâmuran bt. Abdullah’a sattığı Mahrûse-i Bursa mahallâtından Yeşil İmâret mahallesinde sâkine Fâtıma bt. Yusuf nâm hâtun tarafından menzil-i âti’z-zikri bey‘a ve semenini ahz ve kabz ve kendiye îsâle vekîl olup hasm-ı câhid mahzarında ber nehc-i şer‘î üzre vekâleti sâbite olan li ebeveyn karındaşı Ahmed Çelebi meclis-i şer‘-i hatîr-i lâzımü’t-tevkīrde işbu râfi‘atü’l-kitâb Kâmuran bt. Abdullah nâm hâtun mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûrenin medîne-i Hazret-i Ebî Eyyûb el-Ensârî mahallâtından Evlice Baba mahallesinde vâki‘ bir tarafı İskender Bey mülkü ve bir tarafı Yazıcı Mehmed Çelebi mülkü ve bir tarafı Handan Bey mülkü ve bir tarafı tarîk-i âm ile mahdûd olup iki bâb fevkānî ve üç bâb tahtânî odaları ve bi’r-i mâyı ve ayazmayı ve kenîfi ve muhavvata-i zât-ı eşcâr-ı müsmire ve gayr-ı müsmireyi müştemil olan mülk menzilini, cümle tevâbi‘ ve levâhıkı ile mezbûre Kâmuran tarafından îcâb ve kabûlü hâvî bey‘-i bâtt-ı sahîh-i şer‘î ile sekiz bin nakd-i râyic fi’l-vakt fıddî akçeye vekâleten bey‘ ve teslîm edip ol dahi vech-i meşrûh üzre iştirâ ve kabûl eyledikden sonra semeni olan meblağ-ı mezbûr sekiz bin akçeyi müvekkile-i mezbûra îsâl etmek için mezbûre Kâmuran yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûrda müvekkile-i merkūmenin alâka ve medhali kalmayıp mezbûre Kâmuran’ın mülk-i müşterâsı olmuşdur, keyfe mâ yeşâ’ ve tahtâr mutasarrıfa olsun dedikde vekîl-i mezbûru cemî‘ ikrâr-ı meşrûhunda mezbûre Kâmuran vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis aşer min Cemâziyelevvel li sene seb‘a ve erba‘în ve elf. Şuhûdü’l-hâl: Mehmed Efendi b. Ali, el-Hâc Mehmed b. Osman, Ömer b. Musa, Mehmed Çelebi b. Yusuf, Hasan b. Yağmur, Mustafa Beşe b. Mehmed el-Muhtesib, Mustafa b. Veli, Yakub b. Kurd, Cafer b. Abdullah ve gayruhüm.