Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 80 Hüküm no: 36 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Ali’nin Mehmed b. Murad’ı yaralamadığı Medîne-i Hazret-i Ebî Eyyûb el-Ensârî mahallâtından el-Hâc Hüsrev mahallesi sâkinlerinden Mehmed b. Murad nâm kimesne meclis-i şer‘-i hatîr-i lâzımü’t-tevkīrde mahmiye-i Kostantıniyye hısnı ebvâbından Ortakapısı dâhilinde Ali Paşa-yı Atîk mahallesinde sâkin işbu hâmilü’l-kitâb Şaban b. Ali nâm kimesne mahzarında üzerine takrîr-i da‘vâ edip mezbûr Şaban târih-i kitâbdan üç ay mukaddem gece ile sâkin olduğum menzilime girip beni bıçak ile başıma ve arkamda sol küreğimin üzerine urup mecrûh etmişdir bi hasebi’ş-şer‘ suâl olunup ihkāk-ı hak olunması matlûbumdur dedikde gıbbe’s-suâl ve akībe’l-inkâr müdde‘î-i mezbûr Mehmed’in müdde‘âsına mutâbık beyyine taleb olundukda ityân-ı beyyineden izhâr-ı acz edip istihlâf etmeğin mezbûr Şaban mezbûr Mehmed’i vech-i meşrûh üzre urup mecrûh etmediğine yemîn billâhi’l-aliyyi’l-azîm eylediğinden sonra mahalle-i mezbûre Ali Paşa-yı Atîk sükkânından olup zeyl-i kitâbda mastûrü’l-esâmî olan müslimîn ve sâirleri mezbûr Şaban’ın bu âna değin sû-i hâlini görmedik, her vechile ef‘âl ve akvâlinden şâkirleriz deyû hüsn-i hâlini alâ tarîki’ş-şehâde ihbâr eylediklerinde mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâdis min Cemâziyelevvel li sene seb‘a ve erba‘în ve elf. Şuhûdü’l-hâl: Mehmed b. Ahmed el-Müezzin, Hasan b. Ahmed, Kurd Beşe b. Mustafa, es-Seyyid Abdülkādir Efendi, Hasan Beşe b. İvaz er-Râcil, Kasım Beşe b. Hasan, Hasan b. Osman ve gayruhüm.