Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 83 Hüküm no: 42 Orijinal metin no: [5b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe’nin Veli Beşe b. Hüseyin’e olan borcunun terekesinden ödenmesi Zümre-i râcilînden Veli Beşe b. Hüseyin mahfil-i kazâda bundan akdem fevt olan Mustafa Beşe nâm müteveffânın sagīr oğulları Hüseyin ve Mehmed ve Ahmed ve sagīre Râbia’ya kıbel-i şer‘den mansûbe vasîleri olup müteveffâ-yı merkūmun muhallefâtına vâzı‘atü’l-yed olan zevcesi Kerime bt. Ali nâm hâtun tarafından husûs-ı âti’z-zikre vekîl olup nehc-i şer‘î üzre vekâleti sâbite olan Ahmed b. Abdullah muvâcehesinde üzerine takrîr-i da‘vâ edip müteveffâ-yı mezbûr Mustafa Beşe hâl-i hayâtında ve kemâl-i sıhhatinde benden beş bin akçe istikrâz ve kabz edip vilâyet-i Rumeli’nde İshakçı nâzırı olup gāib ani’l-meclis olan Mehmed Çavuş’dan kabûlüne mevkūf havâle ile beş bin akçeyi bana vermekle havâle-i mezbûre tamâm olmayıp merkūm Mustafa Beşe dahi müteveffâ olmağla meblağ-ı merkūm zimmetinde kalmışdır hâlâ meblağ-ı mezbûru metrûkâtından taleb ederim suâl olunsun dedikde gıbbe’s-suâl vekîl-i merkūm husûs-ı mezbûru bi’l-külliye münkir olıcak müdde‘î-i merkūm Veli Beşe’den da‘vâsına muvâfık beyyine taleb olundukda zümre-i râcilînden olup yirmi üçüncü ağa bölüğünden Mustafa Beşe b. Abdullah ve İsmail b. Mustafa nâm kimesne li ecli’ş-şehâde meclis-i şer‘a hâzırân olup işhâd olunduklarında, fi’l-hakīka müteveffâ-yı mezbûr Mustafa Beşe hâl-i hayâtında bizim huzûrumuzda müdde‘iye-i mezbûre Veli Beşe’den beş bin akçe istikrâz ve kabz eyleyip merkūm Mehmed Çavuş’un kabûlüne mevkūfdur deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra mezbûr Veli Beşe’ye meblağ-ı mezbûr beş bin akçeden müteveffâ-yı mezbûr Mustafa Beşe tarafından ve merkūm Mustafa tarafından ve merkūm Mehmed Çavuş tarafından küllen ve ba‘zan istîfâ eylemediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm etmeğin vekîl-i mezbûr Ahmed’e meblağ-ı mezbûr beş bin akçeyi mezbûr Veli Beşe’ye edâya tenbîh olunup mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Receb Efendi b. Abdi, Mustafa Beşe b. Mehmed, Ali Beşe b. Mustafa, Yakub b. Kurd, Mustafa b. Veli.