Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 83 Hüküm no: 41 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstefan v. Andriye’nin bağını Yorgi v. Paros’a sattığı Havâss-ı Refî‘a kazâsı müzâfâtından Küçükçekmece nâhiyesine tâbi‘ Ayastefanos nâm karyeden İstefan v. Andriye nâm zimmî mahfil-i kazâda işbu hâmilü’l-kitâb Yorgi v. Paros nâm zimmî muvâcehesinde ikrâr edip karye-i mezbûrede vâki‘ bir tarafı Dimitraki v. Papa Yani bağı ve bir tarafı Papa Velisar[i] v. Dimitri bağı ve bir tarafı Koyran nâm zimmî bağı ve bir tarafı Aleksandri tarlası ile mahdûd tahmînen üç dönüm bir kıt‘a mülk bağımı mezbûr Yorgi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile altı yüz elli nakd-i râyic fi’l-vakt fıddî akçeye bey‘ ve teslîm edip ol dahi vech-i muharrer üzre iştirâ eyledikden sonra semeni olan meblağ-ı mezbûr iki bin altı yüz elli akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bağ mezbûr Yorgi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î vicâhen mâ vaka‘a bi’t-taleb ketb olundu. Fi’l-yevmi’s-sâmin aşer min Cemâziyelevvel li sene seb‘a ve erba‘în ve elf. Şuhûdü’l-hâl: Yakub Çelebi b. Kurd, Mustafa Çelebi b. Veli, Ali Beşe b. Mustafa, Papa Yani v. Dimitri, Bonvari v. Deveci, Satak? v. İstefani, Nikola v. Todori, Dimo v. Dimitri ve gayruhüm.