Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 86 Hüküm no: 46 Orijinal metin no: [6a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ligora v. Papa Nikola’nın evini istiğlâl yoluyla kadı Mehmed Efendi’ye sattığı Mahmiye-i Kostantıniyye sur kapılarından dâhil-i Fenerkapı’da vâki‘ Abdi Subaşı mahallesinde sâkin olan Ligora v. Papa Nikola nâm zimmî meclis-i şer‘a hâzır olup, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bir tarafdan bâyi‘-i mezkûr mülkü, diğer tarafdan kale duvarı iki tarafdan da tarîk-i âm ile mahdûd bulunan cemî‘ menzilini cümle tevâbi‘ ve levâhıkı ile bir guruş yüz yirmi akçe hesâbı olmak üzre râyicü’l-vakt yüz otuz iki gümüş riyâlî guruşa fahrü’l-kuzât Mehmed Efendi b. Hasan kıbelinden iştirâya vekâleti bimâ hüve nehcü’s-sübût şer‘an sâbit olan Abdülkādir Çelebi b. Mehmed Efendi’ye bey‘ ettiğini ikrâr etti. Vekîl-i mezbûr da müvekkil-i mezkûr malıyla ve istiğlâl maksadıyla menzili ondan iştirâ etti. Bâyi‘-i mezbûrun menzil-i merkūmu icâreye almak istemesi üzerine müşterî-i mesfûr ba‘de’t-tahliyye ve’t-tekābuz zeylde mezkûr ayın gurresinden bir sene tamâmına bin dokuz yüz seksen akçe ücret-i kirâ ile menzili icâreye verdi. Vâki‘ ikrâr, vekîl-i mezbûr tarafından vicâhen ve şifâhen tasdîk edildi. Yani v. Hristodli nâm zimmî ve mukırr-ı merkūmun annesi Laskarina bt. Yani nâm Nasrâniye menzil-i mezbûrun derkine, ücret-i kirâya ve asl-ı mâla îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sânî aşer mine’l-Muharremi’l-harâm sene seb‘a ve erba‘în ve elf. Şuhûdü’l-hâl: Mustafa Efendi b. Mehmed, Siyâmi Efendi b. Tahir, Yakub Çelebi b. Kurd, Cafer b. Abdullah, Mustafa b. ( )