Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 86 Hüküm no: 47 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Resmiye Hatun’un vakfettiği evin tamiri için harcanan paranın keşfi Medîne-i Hazret-i Ebî Eyyûb el-Ensârî mahallâtından Kiremitçi Süleyman mahallesinde vâki‘ bir tarafdan ba‘zan İsa Halîfe vakfı ve ba‘zan Râbia Hâtun vakfı ve bir tarafdan Hasan Paşa sarayı ve bir tarafdan kâtib Mustafa Efendi mülkü ve taraf-ı râbi‘den tarîk-i âm ile mahdûd dâhiliyye ve hâriciyyeyi hâvî olup dâhiliyyesi iki bâb fevkānîyi ve sofayı ve altında bir ahırı ve fırını ve kenîfi ve eşcâr-ı müsmire ve gayr-ı müsmire bağı ve hâriciyyesi bir bâb fevkānîyi ve altında ahırı ve bi’r-i mâyı müştemil olup merhûme Resmiye Hâtun nâm sâhibü’l-hayr vakf ve süknâsını beher yevm kendi rûhiyçün üç İhlâs-ı şerîf ve on bir salavât-ı şerîfe kırâat etmek üzre sulehâya meşrût eylediği ber mûceb-i şart-ı vâkıf mutasarrıf olan kıdvetü’l-hutebâ Hasan Efendi mahfil-i kazâya gelip takrîr-i kelâm edip menzil-i mezbûr mürûr-ı eyyâm ile harâba müşrif olup eğer hâlî üzre kalırsa bi’l-külliye münhedim olup kābil-i süknâ olmaması mukarrer olmağın bundan akdem izn-i şer‘î ve ma‘rifet-i mütevellî hâriciyye ve dâhiliyyesinin ta‘mîr ve meremmete muhtâc olan mahallerini ta‘mîr etmişidim taraf-ı şer‘den üzerine varılıp eylediğim ta‘mîr ve meremmet keşf ve müşâhede ve mesâha ve takvîm olunmak taleb ederim deyû cânib-i şer‘-i kavîmden mevlânâ Mustafa Efendi irsâl olunup ol dahi hâssa mi‘mârlarından üstâd el-Hâc Hasan b. Ömer ve zeyl-i kitâbda muharrerü’l-esâmî olan müslimîn ile menzil-i mezbûra varıp vâki‘ olan ta‘mîr[i] mi‘mâr-ı mezbûr mesâha eyledikde menzil-i mezbûrun hâriciyyesinde olan oda etrâf-ı selâsesinin mücedded binâ olunan dolma duvarı tûlen yirmi üç zirâ‘ kadden dört zirâ‘ bi hesâb-ı şatrancî doksan iki zirâ‘ olup beher zirâ‘ı ellişer akçeden cem‘an dört bin altı yüz akçe ve sakfı tûlen dokuz arzen sekiz bi hesâb-ı mezbûr yetmiş iki zirâ‘ olup beher zirâ‘ı altmış akçeden cem‘an dört bin üç yüz yirmi ve tavanı tûlen altı buçuk arzen altı bi hesâb-ı mezbûr dokuz zirâ‘ olup ellişer akçeden cem‘an bin dokuz yüz elli akçe ve iki ağaç parmaklı pencere ikişer yüz akçeden dört yüz akçe ve musandırasının yirmi aded kestane tahtası olup beher tahta cümle harcı ile on ikişer akçeden cem‘an iki yüz kırk akçe ve dolap iki yüz elli akçe ve döşeme tûlen ve arzen kırk zirâ‘ olup ayak meremmâtı için beher zirâ‘ beşer akçeden cem‘an iki yüz akçe ve nerdübânı altmış akçe ve dâhiliyyesinde vâki‘ sofasının müceddeden binâ olunan sakfı tûlen altı arzen dört bi hesâb-ı mezbûr yirmi dört zirâ‘ olup her zirâ‘ı kırkar akçeden cem‘an dokuz [yüz] altmış ve meremmet olunan dehlizleri için üç dolma direği beher direk otuzar akçeden cem‘an doksan akçe ve sâir meremmâtı için iki yüz seksen sekiz akçe ve zikr olunan iki fevkānî odanın ve dehlizin sakfı tûlen on altı arzen on iki bi hesâb-ı mezbûr doksan iki zirâ‘ ayak meremmâtı için beher zirâ‘ üçer akçeden cem‘an beş yüz yetmiş altı akçe ve müceddeden binâ olunan asma çardağının yirmi altı aded makaslık beher makaslık on ikişer akçeden cem‘an üç yüz on iki akçe ve dört aded miyâne otuzar akçeden cem‘an yüz yirmi akçe ve altı aded dolma direği otuzar akçeden cem‘an yüz seksen akçe ve oda kapısı için altı İznik tahtası beher tahta on dörder akçeden cem‘an seksen dört akçe ve abdesthâne meremmâtı için yüz akçe ve taraf-ı sakfı tûlen sekiz arzen altı bi hesâb-ı mezbûr kırk sekiz zirâ‘ olup ayak meremmâtı için beher zirâ‘ üçer akçeden cem‘an yüz yirmi akçe ve zikr olunan iki odalık bir başmakdan? yukarı müceddeden binâ olunan iki ocağı bin akçe menzil-i mezbûrun zikr olunan ta‘mîr ve meremmetine harc ve sarf olunan meblağ, cem‘an on beş bin yüz elli akçe olup ebniye-i merkūmenin meblağ-ı mezbûra tahammülü vardır, noksân ile ta‘mîr mümkün değildir deyû mi‘mârı- mezbûr ve sâir ahâlî-i vukūf icmâ‘ ve ittifâk eylediklerini mevlânâ-yı mezbûr mahallinde ketb ve tahrîr ba‘dehû meclis-i şer‘de alâ vukū‘ihî ihbâr ve takrîr etmeğin mâ hüve’l-vâki‘ gıbbe’t-taleb ketb olundu. Hurrire fî gurreti şehr-i Cemâziyelevvel li sene seb‘a ve erba‘în ve elf. Şuhûdü’l-hâl: Veli Efendi b. Abdullah, Şaban Halîfe b. Numan, Abdülbâkī Çelebi b. Receb el-Hammâmî, Hüseyin [b.] İsa, Mustafa b. Mehmed, Mustafa b. Veli.