Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 101 Hüküm no: 70 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil ve Bayram kardeşler bağlarını Nikola v. İstati’ye satmaları Mahmiye-i Kostantıniyye mahallâtından Neslişah Sultan mahallesi sâkinlerinden Halil b. Bayram b. İbrahim nâm karındaşlar meclis-i şer‘-i hatîr-i lâzımü’t-tevkīrde işbu hâmilü’s-sifr Niko[la] v. İstati nâm zimmî muvâcehesinde bi tav‘ihâ ikrâr ve i‘tirâf edip vilâyet-i Anadolu’da Yalakābâd kazâsında tâbi‘ Elmalı nâm karye sınırı dâhilinde vâki‘ bir tarafdan Papas oğlu Yuvan nâm zimmî tarlası ve bir tarafdan Arotek zimmî tarlası ve bir tarafdan vâdi ve bir tarafdan tarîk-i âm ile mahdûd ve mümtâz olup ale’l-iştirâki’s-seviy mülkümüz olan bir kıt‘a bağımızı mezbûr Nikola’ya fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semeni mezbûr üç bin akçeyi mezbûr Nikola yedinden alıp kabz edip mebî‘-i mezbûru mahallinde zabt ve tasarrufa mezbûr Nikola’yı taslît eyledik. Ba‘de’l-yevm zikr olunan bağ mezbûr Nikola’nın mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dediklerinde mukırrân-ı mezbûrân Halil ve Bayram’ın minvâl-i muharrer üzre cârî olan ikrârını el-mukarru lehü’l-merkūm Nikola vicâhen tasdîk etmeğin mâ vaka‘a ketb olundu. Târihuhü[’l-mezbûr]. Şuhûdü’l-hâl: Mustafa Bey b. Mehmed, İbrahim Beşe b. Abdi er-Râcil, Eymir Beşe b. Sefer.