Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 207 Hüküm no: 191 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Abdülmümin Çelebi’nin vefat eden hazinedarına hibe ettiği alçı fırını üzerinde vârisinin hak iddia etmediği Mahmiye-i İstanbul’da Sarıdemirci mahallesi ahâlîsinden olup ordu-yı hümâyûnda vefât eden Abdülmümin Çelebi b. Koyunoğlu Mehmed Efendi’nin ammi oğlu ve hasren vârisi olan fahrü’l-akrân Sâlih Çelebi b. Şeyhî Efendi nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda müteveffâ-yı mezbûrun hazînedârı olup hâlâ ordu-yı hümâyûnda fevt olan Ahmed Çelebi b. Mehmed’in li ebeveyn karındaşı ve hasren vârisi olan işbu bâ‘isü’l-kitâb İvaz Beşe nâm kimesne mahzarında bi’t-tav‘i’s-sâf ikrâr ve i‘tirâf edip mûrisim müteveffâ-yı mezbûr Abdülmümin Çelebi’den hâl-i hayâtında [25b] bin yetmiş iki târihinde merkūm İvaz Beşe’nin mûrisi müteveffâ-yı merkūm Ahmed Çelebi’ye mahalle-i mezbûrede vâki‘ bir tarafdan Mehmed Ağa nâm kimesne mülkü ve bir tarafdan Koca Mi‘mâr vakfı’ndan olan değirmen ve bir tarafdan sedd-i kadîm ve bir tarafdan tarîk-i hâs ile mahdûd binâsı muhterik mülk alçı fırını arsasını üzerinde olan beynlerinde ma‘lûm nukzu ile fâriğaten ani’ş-şevâgil hibe-i sahîha-i şer‘iyye ile hibe ve teslîm edip ol dahi ittihâb ve kabûl ve kabz ve tesellüm edip kemâ fi’l-evvel üzerine bir alçı fırını binâ ettiğinden sonra hâliyâ fevt olmağın zikr olunan alçı fırını bi hasebi’l-irsi’ş-şer‘î karındaşı mezbûr İvaz Beşe’ye isâbet ve intikāl etmişdir zikr olunan alçı fırınında benim kat‘â alâka ve medhalim yokdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel li sene seb‘a ve seb‘în ve elf. Şuhûdü’l-hâl: Abdüllatîf Efendi b. Mehmed, Mahmud Çelebi b. Hasan, Mehmed Çelebi b. Hacı Derviş, Mustafa Çelebi b. Mehmed, Deli Mehmed Beşe b. Mehmed, Şükrullah Bey b. Mustafa.