Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 206 Hüküm no: 190 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Çelebi’nin kendisine amcasının oğlu Abdülmümin Çelebi’den veraset yoluyla intikal eden vakfa ait üç demirci dükkânını İsmihan Hatun’a bedeli karşılığı devrettiği Mahmiye-i İstanbul’da Timurtaş mahallesi ahâlîsinden olup bundan akdem vefât eden defter emîni merhûm Mehmed Efendi b. Mehmed’in verâseti sulbî oğlu Abdülmümin Çelebi’ye münhasıra olup ba‘dehû mezbûr Abdülmümin Çelebi dahi vefât edip verâseti li ebeveyn ammi oğlu Sâlih Çelebi b. Şeyhî Efendi’ye münhasıra olduğu şer‘an sâbit oldukdan sonra merkūm Sâlih Çelebi meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahmiye-i mezbûrede Molla Gürânî mahallesi sâkinelerinden umdetü’l-muvakkarât zübdetü’l-muhadderât bâ‘isetü’l-kitâb İsmihan Hâtun bt. ( ) tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mehmed Çelebi b. el-Hâc Derviş ve Abdüllatîf Efendi b. Mehmed şehâdetleri ile şer‘an sâbit olan fahrü’l-akrân Ali Ağa b. Abdülmennân mahzarında ikrâr ve takrîr-i kelâm edip tereke-i müteveffâ-yı evvel-i mezbûrdan olmağla akd-i âtî sudûruna değin bi tarîki’l-irs yedimde mülküm ve hakkım olup mahmiye-i mezbûre hısnı ebvâbından Odunkapısı dâhilinde vâki‘ iki tarafdan tarîk-i âm ve iki tarafdan Çakır Ağa vakfı’ndan olup Hacı Mehmed nâm kimesne tasarrufunda olan dükkânlar ile mahdûd olup arsalarının vakf-ı mezbûra sene de beş yüz kırk akçe mukāta‘ası olan üç bâb demirci dükkânlarının arsalarını vekîl-i müşârün-ileyh Ali Ağa’ya izn-i mütevellî ile meccânen ferâğ ve tefvîz ol dahi müvekkilesi mûmâ-ileyhâ için tefevvuz ve kabûl eyledikden sonra zikr olunan üç bâb dükkânların mülk binâlarını dahi tarafeynden îcâb ve kabûlü hâvî şurût-ı müfsideden ârî bey‘-i bât ile vekîl-i mûmâ-ileyh Ali Ağa’ya elli bin râyic fi’l-vakt akçeye bey‘ ve teslîm ol dahi müvekkilesi müşârün-ileyhâ için iştirâ ve tesellüm eyledikden sonra semen-i mezbûr elli bin akçeyi tamâmen ahz ve istîfâ eyledim min ba‘d zikr olunan dükkânların arsası müvekkile-i müşârün-ileyhânın hakk-ı müfevvazı ve binâsı mülk-i müşterâsıdır mutasarrıf olsun benim alâkam ve medhalim kalmadı dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Kovacılar imâmı Ahmed Efendi, İvaz Beşe b. Mehmed, Ramazan Efendi b. Hasan Efendi, Mehmed b. Şaban Bevvâb-ı sultânî.