Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 102 Hüküm no: 72 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in çiftliğini Mehmed Bey b. Cafer el-Yesârî’ye sattığı Havâss-ı Aliyye kazâsı müzâfâtından Büyükçekmece nâhiyesine tâbi‘ Laçine nâm karye sâkinlerinden Mehmed b. Ahmed nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed Bey b. Cafer el-Yesârî mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan arz-ı hâliye ve bir tarafdan tarîk-i âm ve bir tarafdan mekābir-i müslimîn ve bir tarafdan çeşme ile mahdûd ve mümtâz üç bâb fevkānî ve iki bâb tahtânî odaları ve iki ahırı ve bir samanlığı ve bir çatma anbarı ve zât-ı eşcâr-ı müsmire muhavvatayı müştemil çiftlik ta‘bîr olunur mülk menzilimi, cümle tevâbi‘ ve levâhıkı ile mezbûr Mehmed Bey’e fıddî nakd-i râyic fi’l-vakt yirmi dokuz bin akçeye tarafeynden îcâb ve kabûlü hâvî bey‘-i bi’l-vefâ ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr yirmi dokuz bin akçeyi mezbûr Mehmed Bey yedinden bi’t-tamâm ahz ve kabz eyledim meblağ-ı mezbûr yirmi dokuz bin akçeyi eğer târih-i kitâbdan altmış gün tamâmına değin mezbûr Mehmed Bey’e edâ etmez isem bey‘-i mezbûr bâtta münkalib olup keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a ketb olundu. Tahrîren fî gurreti Recebi’l-ferd li sene seb‘a ve erba‘în ve elf. Şuhûdü’l-hâl: Murad Bey b. Abdullah, Mustafa b. Receb, Mustafa Beşe b. Mahmud, Mustafa b. ( ) el-Hammâmî, Mahmud b. Ahmed, Mustafa b. Veli ve gayruhüm.