Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 102 Hüküm no: 73 Orijinal metin no: [10b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hatun bt. Esad Efendi’nin menzil yerini Menahim v. Hanoka’ya sattığı Medîne-i Hazret-i Ebî Eyyûb el-Ensârî mahallâtından Defterdâr Mahmud Efendi mahallesi sâkinelerinden fahrü’l-muhadderât zahrü’l-muvakkarât Hatice Hâtun bt. mevlâ’l-merhûm şeyhülislâm fî avânihî müfti’l-enâm fî asrihî ve zamânihî Esad Efendi tarafından bey‘-i âti’l-beyâna ve kabz-ı semene vekîl olup vekâleti müşârün-ileyhâ Hatice Hâtun’u ma‘rifet-i şer‘iyye ile ârifeyn olan Mehmed b. Abdullah ve diğer Mehmed b. Hüseyin şehâdetleri ile sâbite Bedehşan Hâtun bt. Abdullah meclis-i şer‘-i hatîr-i lâzımü’t-tevkīrde işbu hâmilü’s-sifr Menahim v. Hanoka nâm Yahudi muvâcehesinde bi’l-vekâle ikrâr-ı tâm ve takrîr-i kelâm edip müvekkilem müşârün-ileyhâ Hatice Hâtun’un silk-i mülkünde münselik olan emlâkinden olup medîne-i mezbûre [30a] müzâfâtından Hasköy’de vâki‘ iki tarafdan müvekkile-i mezbûre Hatice Hâtun mülkü ve bir tarafdan Mihayil ve Paroh ve Hırsola nâm Yahudiler mülkleri ve bir tarafdan Menahim nâm Yahudi vakfı olan menzil yeri ile mahdûd mezbûrûn Mihayil ve Paroh ve Hırsola ile mâbeyninde müşterek bi’r-i mâyı müştemil bi’r-i mâ tarafından on zirâ‘ ve bir tarafdan on yedi zirâ‘ ve bir tarafdan yirmi zirâ‘ yine yirmi zirâ‘ mülk menzil yerini, zikr olunan nısf bi’r-i mâ ile sâlifü’z-zikr Menahim vakfı tarafında vâki‘ müvekkile-i müşârün-ileyhânın hakk-ı mürûru olan tarîk-i hâssa kuyu açmak üzre vekâlet-i mahkiyem hasebiyle mezbûr Menahim’e fıddî nakd-i râyic fi’l-vakt iki bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin beş yüz akçeyi mezbûr Menahim yedinden tamâmen alıp kabz edip teslîm-i mebî‘ eyledim ba‘de’l-yevm zikr olunan menzil yeri, mezbûr Menahim’in mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mezbûr Bedehşan’ı bi’l-vekâle sâdır olan ikrârında mezbûre Menahim vicâhen ve şifâhen tasdîk etmeğin mâ vaka‘a gıbbe’t-taleb ketb olundu. Tahrîren fi’l-yevmi’s-sâmin ve’l-ışrîn min Cumâdelâhire li sene seb‘a ve erba‘în ve elf. Şuhûdü’l-hâl: Abdurrahman Halîfe b. Abdullah el-İmâm, es-Seyyid Mustafa Çelebi, İbrahim Beşe b. Abdullah, Mehmed b. Osman, Mahmud b. Ahmed, Mustafa b. Veli ve gayruhüm.