Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 104 Hüküm no: 75 Orijinal metin no: [11a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Duka v. Koki’nin dükkanının yarı hissesini İstirati v. Kirici’ye sattığı Vilâyet-i Rumeli’nde Ergirikasrı kazâsına tâbi‘ Sanagoplu nâm karye sâkinlerinden Duka v. Koki nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr İstirati v. Kirici nâm zimmî muvâcehesinde bi’t-tav‘i’s-sâf ikrâr ve i‘tirâf edip Havâss-ı Aliyye kazâsı müzâfâtından Gürz Nikola taşlığı demekle ma‘rûf mevzi‘de vâki‘ bir tarafdan Solak tarlası ve bir tarafdan Dimo dükkânı ve bir tarafdan keresteci Kiko dükkânı ve bir tarafdan Karboz nâm zimmî tarlası ile mahdûd ve mümtâz olup arsasının merhûm Sultan Bayezid evkāfı’na senevî altmış akçe mukāta‘ası olup Niko nâm zimmî ile ale’l-iştirâki’s-seviy mülkümüz olan bir bâb dükkândan nısf hisse-i şâyi‘amı, mezbûr İstirati’ye fıddî nakd-i râyic fi’l-vakt beş bin dört yüz akçeye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl ettikden sonra semeni mezbûr beş bin dört yüz akçeyi mezbûr İstirati yedinden tamâmen alıp kabz edip teslîm-i mebî‘ eyledim ba‘de’l-yevm zikr olunan dükkânın nısf-ı şâyi‘i mezbûr İstirati’nin mülk-i müşterâsı olmuşdur dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa b. Veli, Yakub b. Kurd, Duka [v.] Yoki, Dimo [v.] Yorgi, Duka [v.] Dido, Kiko v. ( ).