Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 105 Hüküm no: 77 Orijinal metin no: [11a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaline ve kızı Marola’nın evlerini Todori v. Yorgi’ye satmaları Mahmiye-i Kostantıniyye ebvâbından Edirnekapısı dâhilî sâkinelerinden Kaline bt. Dimitri ve mezbûre Kaline’nin sadriye kebîre kızı [M]arola bt. Toma nâm Nasrâniyeler mahfil-i kazâda işbu hâmilü’l-kitâb Todori v. Yorgi nâm zimmî mahzarında her biri bi’t-tav‘i’s-sâf ikrâr ve i‘tirâf edip Havâss-ı Refî‘a kazâsı müzâfâtından kasaba-i Midye mahallâtından Ayatanaş mahallesinde vâki‘ bir tarafı Mehmed mülkü ve bir tarafı yine mezbûr Mehmed Bey tarlası ve bir tarafı Kosta mülkü ve bir tarafı ba‘zan çeşme ve ba‘zan tarîk-i âm ile mahdûd bir bâb çatma odayı ve muhavvatayı müştemil olup kızım mezbûre Marola’nın babası zevcim hâlik-i [mer]kūm Toma’dan bi hasebi’l-irsi’ş-şer‘î bizim ikimize intikāl eden mülk menzilimizi, merkūm Todori’ye bin yüz nakd-i râyic fi’l-vakt akçeye îcâb ve kabûlü hâvî bey‘-i bâtt-ı sahîh ile bey‘ edip ol dahi iştirâ ve kabûl eyledikden sonra semeni olan meblağı bin yüz akçeyi mezbûr Todori yedinden bi’t-tamâm ahz ve kabz eyleyip mebî‘-i mezbûru mahallinde kabz ve tesellüme müşterî-i merkūm Todori’yi taslît eyledik. Ba‘de’l-yevm menzil-i mezbûr mülk-i müşterâsıdır, keyfe mâ yeşâ’ mutasarrıf olsun dediklerinde mezbûretân Kaline ve Marola’nın ber vech-i meşrûh cârî olan ikrârlarını el-mukarru lehü’l-merkūm Todori vicâhen tasdîk ve şifâhen tahkīk edicek mâ hüve’l-vâki‘ gıbbe’t-tasdîk ketb olundu. Tahrîren fi’l-yevmi’t-tâsi‘ ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Beşe b. Mahmud, Mustafa Çelebi b. Veli, Yakub b. Kurd, Cafer b. Abdullah, Teveli Reis v. Berdik, Dimitraki v. Sefreni, Dimitri v. Todori, Yorgi v. Dokana, Yorgi v. Hakal? ve gayruhüm.