Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 105 Hüküm no: 78 Orijinal metin no: [11b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstati v. Yorgi’nin evini istiğlâl yoluyla Behram Bey Vakfı’na sattığı Mahmiye-i Kostantıniyye sur kapılarından Fener kapısı dâhilindeki Abdi Subaşı mahallesinde sâkin olan İstati v. Yorgi nâm zimmî meclis-i şer‘-i şerîfde hâzır olup âtiyyü’z-zikr menzilini, merhûm Behram Bey vakfı’na mütevellî olan hâmil-i hâze’l-kitâb Hüseyin Halîfe b. Şaban’a bey‘ ettiğini ikrâr ve i‘tirâf etti. Mütevellî-i mezbûr da, vakf-ı mezbûr malıyla ve istiğlâl maksadıyla, zimmî-i mesfûrun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede kâin bulunan ve bir tarafdan İskarine bt. Tatyon mülkü, diğer tarafdan Todori v. (…) mülkü, öteki tarafdan Vranya v. Yorgi mülkü ve diğer tarafdan da tarîk-i âm ile mahdûd olan cemî‘-i menzilini râyicü’l-vakt on bir bin akçe semen-i mu‘ayyen-i makbûzla ondan iştirâ etti. Mütevellî-i mezbûr vâki‘ ikrârı vicâhen ve şifâhen tasdîk etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr târihden üç sene tamâmına dört bin yüz yirmi beş akçe ücret ile menzil-i mezbûru kirâya verdi. Andriye v. Yorgi ve Nikola v. İstemad nâm zimmîlerin her biri, menzil-i mezbûrun derkine ve ücret-i kirâya îcâb ve kabûlü hâvî kefâletle kefîl oldu. Cerâ zâlike ve hurrire fî gurreti Cumâdelûlâ sene seb‘a ve erba‘în ve elf. Şuhûdü’l-hâl: Hüseyin b. Abdullah, Şeyh İbrahim b. Ramazan, Şaban Halîfe b. Hüseyin, Mehmed b. Abdullah, Abdülkerim b. Mehmed, Hasan b. Davud, Ali Bâli b. Hüdâverdi, Ömer b. Siyâmi, Hayrullah b. Abdullah, İbrahim b. Hasan ve gayruhüm