Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 109 Hüküm no: 84 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köni ve Kiro’nun Mehmed Ağa b. Abdülkâdir’den ekmekçi fırını kiralamaları Arnavud tâifesinden Köni v. Papa Niko ve Kiro v. Boğdan nâm zimmîler meclis-i şer‘-i hatîr-i lâzımü’t-tevkīrde medîne-i Hazret-i Ebî Eyyûb el-Ensârî mahallâtından Çavuş Kasım mahallesinde sâkin sâhibü’l-kitâb Mehmed Ağa b. Abdülkādir tarafından ikrâr-ı âti’z-zikri tasdîka vekîl olup bimâ hüve nehcü’s-sübût şer‘an vekâleti sâbite olan Mustafa Halîfe b. İlyas el-İmâm muvâcehesinde her biri bi’t-tav‘ ikrâr ve i‘tirâf edip müvekkil-i merkūm Mehmed Ağa’nın yedinden otuz bin nakid akçe sermâye için istikrâz ve kabz eylediğimizden sonra medîne-i mûmâ-ileyh sûkunda vâki‘ arsasının hazret-i müşârün-ileyh vakfına ve Vehbe Hoca vakfı’na yevmî sekiz buçuk akçe mukāta‘ası olan iki at değirmenini müştemil ekmekçi fırınını, târih-i kitâbdan sene tamâmına değin yevmî elli sekiz buçuk akçe icâre ile ale’l-iştirâk ikimize îcâr ve teslîm edip biz dahi vech-i meşrûh üzre istîcâr ve kabz ve tesellüm eyledik değirmenlere taş lâzım geldikde ve çarhlarını ve sâir mevâzi‘ini külliyet ile tecdîd lâzım geldikde, müvekkil-i merkūm Mehmed Ağa edip üç yüz akçeye varınca meremmât-ı cüz’iyyesin biz etmek üzre dediklerinde mukırrân-ı mezbûrân Köni ve Kiro’nun minvâl-i meşrûh üzre cârî olan ikrârlarını mezbûr Mustafa Halîfe bi’l-vekâle tasdîk etmeğin mâ hüve’l-vâki‘ gıbbe’t-taleb ketb olundu. Tahrîren fî selhi Cemâziyelevvel li sene seb‘a ve erba‘în ve elf. Şuhûdü’l-hâl: Sefer b. Abdullah, Hüseyin Çelebi b. Mehmed, Ahmed Halîfe b. Mehmed el-Müezzin, Ahmed Dede b. ( ), Mehmed b. Davud, Cafer b. Abdullah, Mehmed b. Ali.