Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 108 Hüküm no: 83 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çavuş Kasım mahallesinden Hacı Yusuf Bey b. Hasan’ın Aynîşah Sultan Vakfı’ndan kiraladığı çiftliği süre bitiminde iâde ettiği Medîne-i Hazret-i Ebî Eyyûb el-Ensârî mahallâtından Çavuş Kasım mahallesinde sâkin el-Hâc Yusuf Bey b. Hasan mahfil-i kazâda mahmiye-i İstanbul’da vâki‘ merhûme Aynîşah Sultan vakfı’na bi’l-fi‘l mütevellî olan Mahmud Çelebi b. Mustafa mahzarında ikrâr ve takrîr-i kelâm edip mezbûr Çelebi’den evkāf-ı mezbûreden olup Havâss-ı Aliyye kazâsına tâbi‘ Tilkiköyü demekle ma‘rûf karyede vâki‘ ma‘lûmü’l-hudûd çiftliği ve beynimizde ma‘lûm cemî‘ arâziyi ve devâb ve mevâşîyi ve çayırları ile bin kırk beş Cemâziyelevveli’nin on beşinci gününden beş sene tamâmına değin beher sene sekiz bin ikişer yüz akçeye istîcâr edip ol dahi vech-i muharrer üzre tevliyyeti hasebiyle cânib-i vakıfdan bana îcâr ve teslîm edip târih-i mezbûrdan bir sene tamâmına değin mutasarrıf olup meblağ-ı mezbûr sekiz bin iki yüz akçenin bin iki yüz akçesini emriyle zikr olunan çayırların mukāta‘asıyçün ve mağfiret-nişân Ebü’l-feth Sultan Mehmed Hân evkāfı mütevellîsine def‘ ve teslîm edip meblağ-ı bâkī yedi bin akçeyi dahi merkūm Mahmud Çelebi’ye teslîm edip ol dahi kabz ve tesellüm eyledikden sonra tarafeynin rızâsı ile yine bin kırk altı senesi Cumâdelûlâsı evâsıtında fesh-i îcâr eyleyip zikr olunan çiftliği mütevellî-i mezbûr Mahmud Çelebi’ye teslîm eylemiş idim dedikde mukırr-ı merkūmun cemî‘ ikrâr-ı meşrûhunu mütevellî-i merkūm vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî evâhiri Cemâziyelevvel li sene seb‘a ve erba‘în ve elf. Şuhûdü’l-hâl: Mahmud Efendi b. Hasan, Ali Efendi b. İbrahim, Hüseyin Bey b. Ahmed el-Bevvâbü’s-sultânî, Hüseyin Beşe b. Yusuf, Mustafa b. Rıdvan.