Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 127 Hüküm no: 110 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâmuran bt. Abdullah’ın evini Münteha bt. Abdullah’a sattığı Medîne-i Hazret-i Ebî Eyyûb el-Ensârî mahallâtından Evlice Baba mahallesi sâkinelerinden Kâmuran bt. Abdullah nâm hâtun tarafından bey‘-i âti’z-zikre ve kabz-ı semene vekîl olup hasm-ı câhid mahzarında Kurd Beşe b. Abdullah ve Ahmed b. Receb şehâdetleri ile şer‘an vekâleti sâbite olan Mustafa b. Mehmed nâm kimesne meclis-i şer‘-i hatîr-i lâzımü’t-tevkīrde işbu sâhibetü’l-kitâb Münteha bt. Abdullah tarafından şirâ-i âti’z-zikre ve def‘-i semene vekîl olup vekâleti mezbûre Münteha’yı ma‘rifet-i şer‘iyye ile ârifeyn olan Mesud b. Abdülmennân ve Ömer b. Gülâbî şehâdetleri ile şer‘an sâbite olan mezbûre Münteha’nın zevci Kurd Beşe b. Abdullah mahzarında bi’l-vekâle ikrâr ve i‘tirâf edip mahalle-i mezbûrede vâki‘ bir tarafdan İskender Bey mülkü ve bir tarafdan Handan Bey mülkü ve bir tarafdan Yazıcı Mehmed Çelebi mülkü ve bir tarafdan tarîk-i âm ile mahdûd olup iki bâb fevkānî ve üç bâb tahtânî odaları ve bi’r-i mâyı ve ayazma ve kenîfi ve muhavvata-i zât-ı eşcâr-ı müsmire ve gayrı müsmireyi müştemil olan mülk menzilini, cümle tevâbi‘ ve levâhıkı ile mezbûre Münteha için fıddî nakd-i râyic fi’l-vakt on bin iki yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Kurd Beşe bey‘ edip ol dahi vech-i muharrer üzre müvekkilesi için iştirâ ve kabûl eyledikden sonra semeni mezbûr on bin iki yüz akçeyi vekîl-i mezbûr Kurd Beşe yedinden tamâmen alıp kabz edip teslîm-i mebî‘ eyledi ba‘de’l-yevm zikr olunan menzil mezbûre Münteha’nın mülk-i müşterâsı olmuşdur, keyfe mâ teşâ’ ve tahtâr mutasarrıfe olsun dedikde vekîl-i mezbûr Mustafa’yı ikrâr-ı meşrûhunda vekîl-i âhar Kurd Beşe vicâhen ve şifâhen tahkīk edicek mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min Cumâdelâhire li sene seb‘a ve erba‘în ve elf. Şuhûdü’l-hâl: Mustafa b. Hüseyin, Ferhad b. Abdullah, Ömer Halîfe el-Müezzin, Mahmud Çelebi b. Mehmed, Mahmud b. Ahmed, Yakub b. Kurd, Mustafa b. Veli.