Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 128 Hüküm no: 111 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemsiruhsâr Hatun’un çayırını Aleksi ve Androni’ye sattığı Mahmiye-i Kostantıniyye hısnı ebvâbından Silivrikapısı dâhilinde İbrahim Paşa mahalle[sinde] sâkine kıdvetü’l-muhadderât zübdetü’l-muvakkarât Şemsiruhsâr Hâtun bt. Abdullah tarafından tefvîz-i âti’z-zikri edâya vekîl olup bimâ hüve nehcü’s-sübût şer‘an vekâleti sâbite es-Seyyid Ebûbekir Çelebi es-Seyyid Abdülhay mahfil-i kazâda râfi‘-i hâze’l-kitâb Aleksi v. Yani nâm zimmî ve oğlu Androni zimmî muvâcehesinde bi’l-vekâle ikrâr ve i‘tirâf edip müvekkile-i mezbûre Şemsiruhsâr Hâtun işbu tefvîz sudûruna değin taht-ı tasarrufunda olup Havâss-ı Aliyye kazâsı müzâfâtından Terkos nâhiyesine tâbi‘ Ayazma nâm karyede vâki‘ bir tarafdan Kaldo zimmî ve bir tarafdan dere ve bir tarafdan mer‘â ve bir tarafdan Dor nâm kimesne çayırı ile mahdûd Sultan Mehmed Hân evkāfı’na on beş akçe mukāta‘ası olan üç arabalık iki kıt‘a biribirine muttasıl çayırın hakk-ı tasarrufu[nu], mezbûrûn Aleksi ve Androni’ye fıddî nakd-i râyic fi’l-vakt üç bin beş yüz akçe bedel-i tefvîz ile ve mütevellî-i vakf-ı mezbûr ma‘rifetiyle tefvîz edip ol dahi vech-i muharrer üzre tefevvuz ve kabûl eyledikden sonra meblağ-ı mezbûr üç bin beş yüz akçeyi yedinden ahz ve kabz edip teslîm eyledi dedikde mâ vaka‘a bi’t-taleb kayd şüd. Hurrire fi’t-târihi’l-mezbûr. Şuhûdü’l-hâl: Ahmed Ağa b. Abdullah, Mustafa Efendi b. ( ) el-İmâm, Yakub [b.] Kurd, Mustafa b. Veli.