Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 139 Hüküm no: 129 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İskender b. Abdullah ve karısının vakfettiği evin tamiri masraf keşfi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Dökmecibaşı mahallesinde sâkin Mehmed Bey b. Mustafa mahfil-i kazâya gelip takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan merhûm Borazan Mehmed Çelebi eytâmı mülkü ve bir tarafdan Ak Mehmed Çelebi nâm kimesne mülkü ve iki tarafdan tarîk-i âm ile mahdûd iki bâb tahtânî beyti ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil olup merhûm İskender b. Abdullah nâm kimesne ve zevcesi Devlet bt. Abdullah nâm hâtun ma‘an vakf ve gallesini mahalle-i mezbûra emâneten şart eylediği beher şehr on beş akçe ücret-i müeccele mutasarrıf olduğum menzilin ta‘mîre muhtâc mevâzi‘in ta‘mîr edip harc ve sarf eylediğim meblağ icâre-i mu‘acceleye mahsûb olmak üzre bundan akdem izn-i şer‘ ve izn-i mütevellî ile ta‘mîr ve termîm etmişidim el-hâletü hâzihî taraf-ı şer‘den üzerine varılıp menzil-i mezbûru ta‘mîr ve termîmi için harc ve sarf eylediğim meblağın mertebe-i tahammülü keşf ve terkīm olunmak matlûbumdur dedikde savb-ı şer‘-i kavîmden mevlânâ Mustafa Efendi irsâl olunup ol dahi neccârlardan üstâd Mustafa ve zeyl-i kitâbda muharrerü’l-esâmî olan müslimîn ile menzil-i mezbûrun üzerine varıp mezbûr Mehmed Bey’in ta‘mîr ve termîm eylediği mevâzi‘i keşf ve müşâhede eylediklerinde menzil-i mezbûrun tarîk-i âm tarafında olan tahta duvarı için on beş aded direk, beher direk on altışar akçeden cem‘an iki yüz on beş akçe ve otuz aded kuşaklık, her biri sekiz akçeden cem‘an iki yüz kırk akçe ve yüz yirmi aded gürgen tahtası, beher tahta dokuzar akçeden cem‘an bin seksen akçe ve zikr olunan tahtânî odanın müceddeden binâ olunan kapısı için yüz akçe ve kenîf ta‘mîri için iki yüz akçe ve mevâzi‘-i adîdede ba‘zı meremmât için yüz kırk beş akçe zikr olunan ta‘mîr ve termîm cem‘an iki bin akçe olup ta‘mîr-i mezbûrun meblağ-ı merkūma tahammülü olduğu üstâd-ı mezbûr ve sâir ahâlî-i vukūf icmâ‘ ve ittifâk ettiklerini mevlânâ-yı mezbûr mahallinde ketb ve tahrîr ba‘dehû meclis-i şer‘de alâ vukū‘ihî ihbâr ve takrîr etmeğin mâ hüve’l-vâki‘ ketb olundu. Hurrire fi’l-yevmi’s-sânî aşer min Recebi’l-ferd li sene seb‘a ve erba‘în ve elf. Şuhûdü’l-hâl: Nasuh Halîfe b. Mehmed el-İmâm, es-Seyyid Hüseyin Çelebi b. es-Seyyid Ahmed, Mehmed Çelebi b. Mehmed, Mustafa [b.] Mehmed, Şaban b. Musa, Musli b. Receb.