Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 140 Hüküm no: 130 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nano v. Atanaş’ın ev bağ ve tarlanın kendine ait hissesini Minho ve Vasil v. Kaylo’ya sattığı Vilâyet-i Rumeli’nde Arnavud Belgradı kazâsına tâbi‘ Priştin nâm karye zimmîlerinden Nano v. Atanaş nâm zimmî tarafından husûs-ı âti’z-zikri ikrâra vekîl olup hasm-ı câhid mahzarında Hasan b. Abdullah ve Minho v. Maço nâm kimesneler şehâdetleri ile şer‘an vekâleti sâbite olan Minho v. Yani nâm zimmî mahfil-i kazâda işbu râfi‘ü’l-kitâb Minho ve Vasil v. Koylo nâm karındaşlar muvâcehelerinde bi’l-vekâle ikrâr-ı tâm ve takrîr-i kelâm edip müvekkil-i mezbûr Nano karye-i merkūmede vâki‘ bir tarafı Atanaş v. Nika ve bir tarafdan Vasil v. Mine ve bir tarafdan Dimo v. Mine mülkü ve bir tarafı ba‘zan Yano v. Nano mülkü ve ba‘zan tarîk-i âm ile mahdûd bir bâb tahtânî beyti ve muhavvata-i zât-ı eşcâr-ı müsmire ve gayr-ı müsmireyi müştemil olan menzilden rub‘ hisse-i mu‘ayyenesini ve ana muttasıl tahmînen üç çapalık ma‘lûmü’l-hudûd bir kıt‘a mülk bağını ve bir fohusunu? ve mevâzi‘-i müteferrikada vâki‘ altı dip dut ve bir dip incir ağaçlarını mezbûrân Minho ve Vasil’e iki bin nakd-i râyic fi’l-vakt fıddî akçe[ye] tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ edip onlar dahi ale’l-iştirâki’s-seviy iştirâ ve tesellüm eylediklerinden sonra yine karye-i mezbûre sınırında mevâzi‘-i adîdede vâki‘ tahmînen on dönüm ma‘lûmü’l-hudûd dört kıt‘a tarlasının dahi hakk-ı tasarrufunu, mezbûrân Minho ve Vasil’e sâhib-i arz ma‘rifetiyle iki yüz mezbûrü’n-na‘t akçe mukābelesinde tefvîz edip onlar dahi ale’l-iştirâki’s-seviy üzerine tefevvuz ve kabûl eylediklerinden sonra bedel-i tefvîz olan meblağ-ı mezbûr iki yüz akçe ile semen-i merkūm iki bin akçe ki cem‘an iki bin iki yüz akçeyi yedlerinden bi’t-tamâm ve’l-kemâl ahz ve kabz eyleyip emlâk-i mezbûreyi mahallinde kabz ve tesellüme ve mezâri‘-i merkūmeyi zabt ve tasarrufa merkūmân Minho ve Vasil’i taslît eyledim dedikde vekîl-i mezbûrun ber vech-i meşrûh cârî ve sâdır olan ikrâr ve takrîrini merkūmân Minho ve Vasil vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ aşer min şehri Recebi’l-mürecceb li sene seb‘a ve erba‘în ve elf. Şuhûdü’l-hâl: Ali Çelebi b. ( ), Hasan b. Abdullah, Sinan b. Mehmed, Mahmud b. Ahmed, Oruc b. Abdullah, Minho [v.] Mitro, Minho v. Minho, Niko v. Koço, Niko v. Tanoş, Kosta v. Dimo, Reste v. Arnod, Minho v. Dimo, Minho v. Foçi, Dimo v. Atanaş, Minho v. Manos ve gayruhüm.